Бæрнон кусджытимæ Дзæуджыхъæуы æмæ республикæйы 6 районы федта 15 арæзтадон фæзæй фылдæр
Тускъаты Таймураз радон инспекцион балц скодта Цæгат Ирыстоны арæзтадон объекттæм. Бæрнон кусджытимæ Дзæуджыхъæуы æмæ республикæйы 6 районы федта 15 арæзтадон фæзæй фылдæр. Сты æнæниздзинадхъахъхæнынады, ахуырады æмæ культурæйы объекттæ. Цавæр хатдзæгтæ скодта кусæг балцæн, уый тыххæй радзурдзæн Касаты Наирæ.
Национ музейы ацы аз бавнæлдтой рацарæзты дыккаг къæпхæнмæ. Цалынмæ сыхаг агъуыстыты куыстытæ цæуынц, уæдмæ уал сæйраг равдыстыты залы равæрдтой экспонаттæ. Экскурси арæзт æрцыди Хицауады сæрдарæн. Тускъаты Таймураз йæхи цæстæй федта æмæ разыйæ баззад цалцæггæнæн куыстытæй. Фæлæ ма дзы баззад гом фарстатæ.
Сырдоны дур кæнæ инæлар Иван Хижнякы истори… Ацы хабæрттæ радзурынæн дзы адæймаг нæ разынди. Нæй дзы экскурсовод. Музейы разамонæг йæ кусджыты агурын райдыдта телефонæй. Республикæйы хицауады сæрдар йæ раныхасы куыд загъта, афтæмæй куыст хъæуы гыццыл æндæр хуызы рааразын. Фылдæр кусын хъæуы залты æрбацæуджытимæ, кабинетты нæ, фæлæ.
Социалон объектты арæзтады сæйраг бынæттæй иу ахсы ахуырады министрады куыстуæттæ. Республикæйы фæстаг цалдæр азы архайд цæуы скъолайы агъоммæйы ахуыргæнæндæттæм рад фæкъаддæр кæныныл. Ацы аз аразын райдыдтой ног рæвдауæндæттæ, стæй раздæры бæстыхæйттæм уæлæмхасæнтæ æфтауын. Тускъаты Таймураз бабæрæг кодта Горæтгæроны, Æрыдоны, Алагиры, Дыгуры æмæ Æрæфы районы ахуырадон фæзтæ. Афтæ, зæгъæм Ногиры кусы æрмæстдæр иу рæвдауæндон. Йæ бон лæггад кæнын у æрмæстдæр 135 сывæллонæн. Фæлæ уый фаг нæу. Июлы дзы райдыдтой уæлæмхасæн бынæттæ 20 сывæллонæн аразын. Премьерæн равдыстой куыстыты процесс.
Куырттаты та сæ тæмæны ис ног фельдшерон акушерон пункты арæзтад. Иу бонмæ лæггад кæндзын 50 адæймагæн. Бригад кусы тагъд. 15 адæймаджы размæ вæрд ис хæс куыстытæ бæлвырд рæстæгмæ фæуын. Объект хъуамæ эксплуатацийы радтой ноябрьмæ.
Куыд фарон, афтæ ацы аз дæр активонæй цæуы æнæниздзинадхъахъхъæнынады объектты арæзтад.Ног амбулатори аразынц Майскæйы дæр. Стыр рацарæзт цæуы Æрыдоны рынчындоны дæр.
Тускъаты Таймураз бæлвырдæй æрлæууыди Нартыхъæуы культурон центры куыстытыл. Культурæйы артдзæсты цæуынц бындурон цалцæггæнæн куыстытæ.
Культурæйы хæдзар цалцæг кæнынц Сечеры дæр. Аразджытæ райстой æдзæллаг бæстыхай. Куыд зæгъынц, афтæмæй уыди тæссаг. Фæлæ дзы ахæм уавæрты куыстой адæм.
Республикæйы уыцы иу рæстæг цæуы цалдæр бирæвæрсыг фæзы арæзтад. Хицауады сæрдар уыди Тарскæйы, æмæ Советскийы арæзтадтæ. Суададжы та сывæллæтты арæзтадимæ уыцы иу рæстæг цалцæг кæнынц скъолайы спортивон зал. Премьер цыдæр хъуыддæгтæй разы нæ уыди. Радта сын рæстæг, цæмæй аиппдзинæдтыл бакусыой.
Республикæйы социалон объектты арæзтад цæуы национ проект æмæ федералон нысанон программæты фæлгæты. Тускъаты Таймураз бабæрæг кодта 6 районы æмæ 15 арæзтадон фæзæй фылдæр.
