Поликлиникæты прививкæтæ кæндзысты, 5 азы онг кæуыл цæуы, ахæм сывæллæттæн
Цæгат Ирыстоны райдыдта полиомиелиты ныхмæ иммунизаци. Поликлиникæты прививкæтæ кæндзысты, 5 азы онг кæуыл цæуы, ахæм сывæллæттæн. Фæлхасадмæ цæстдарды службæйы куыд зæгъынц, афтæмæй ныртæккæ республикæйы ацы низæй рынчынтæ нæй. Фæлæ профилактикæ у æнæмæнг хъуыддаг. Уымæн æмæ низ расайы уæззау фæстиуджытæм.
Полиомиелитæй адæймагæн йæ бон фæрынчын уæвын у уæлдæфы уылты дæр, фæлæ арæхдæр низ бахæцы чъизи къухтæй кæнæ хæринагæй. Дохтыртæ куыд зæгъынц, афтæмæй эпидемийæ тæссаг нæу. Прививкæтæ конд цы сывæллæттæ ис, уыдонæн та дзы тæссаг æппындæр нæу. Специалистты ныхæстæм гæсгæ, вакцинæ адæймагыл фæзыны уайтагъд. Иммунитет та дзы фæфидар вæййы цæрæнбонтæн. Уый бирæ ныййарджытæ дæр æмбарынц. Фарон сывæллæтты 4% æрмæстдæр 1% -æн не скодтой прививкæтæ. Сæ аххосæгтæ сты алыхуызон. Кæмæн операцигонд уыди, кæмæн йæ низмæ гæсгæ нæ уыди прививкæ скæнæн. Ис ахæм мадæлтæ, кæй нæ бафæндыд прививкæ скæнын йæ сывæллонæн. Фæлæ цæй тыххæй, уый бамбарын кæнын сæ бон нæ баци. Ахæм сывæллæтты дохтыртæ бахæссынц, тæссаг кæмæн у, ахæм сабиты хыгъдмæ. Абоны онг сты 21.
Фæткмæ гæсгæ, алы сывæллон дæр афæдзмæ полиомиелиты ныхмæ вакцинæ райсы æртæ хатты. Ацы прививкæ ахуыргæндтæ куы æрхъуыды кодтой, уæд æй медицинæйы схуыдтой сенсаци. Уымæн æмæ абоны онг ацы низ нымад у, сдзæбæхгæнæн кæмæн нæй, ахæмыл. Йæ фæсиуджытæн сæ бон расайын у параличмæ, æмæ суанг амæлыны онг.
Дыууæ мины æвддæсæм азы бирæ регионты полиомиелиты ныхмæ вакцинæ нæ фаг кодта. Уымæн æмæ йæ æнæниздзинадхъахъхъæнынады æппæтдунеон организаци ахадгæйыл нæ банымадта. Фæлæ йæ уый хыгъд Уæрæсе медицинæйы ныффидар кодта. Республикæйы дохтыртæ ныры онг тæрсынц уыцы истори та куы сфæлхат уа, уымæй. Уымæ гæсгæ, ныййарджытæй курæг сты, цæмæй æрбацæуой æмæ скæной æмбæлгæ прививкæ. Вакцинаци фæуыдзæн октябры кæрон.
