Гулуты Хизир фронтмæ ацыд 15-аздзыдæй.
Цæгат Ирыстоны сæргълæууæг Битарты Вячеслав бафыста указ, республикæйы уæлдæр хæрзиуæг – «Ирыстоны Намысы» орденæй Фыдыбæстæйы Стыр хæсты ветеран Гулуты Хизиры схорзæхджын кæныны тыххæй. Гулуты Хизир фронтмæ ацыд 15-аздзыдæй. 1943-æм азы январы Ижерск суæгъд кæныны тохы æрыгон ирыстойнаг лæппу йæхимæ райста командæгæнæджы хæстæ, æмæ пулемет «Максим»-æй пайда кæнгæйæ, сыгъдæг кодта фæндаг фистæгæфсæддонтæн. Уымæй дарддæр Гулуты Хизир архайдта Краснодары край суæгъд кæныны тохты дæр. Уым фæци уæззау цæф, фæлæ тохы быдырæй цæуын нæ бакуымдта. Йæ хъæбатырдзинады тыххæй хорзæхгонд æрцыд Сырх Стъалыйы, стæй Фыдыбæстæйы Стыр хæсты фыццæгæм æмæ дыккæгæм къæпхæнты ордентæй. Гулуты Хизир райгуырд Цыколайы 1927-æм азы. Ныртæккæ дæр кæны стыр хъомыладон æмæ патриотон куыст фæсивæдимæ. У Дзæуджыхъæуы Промышленнон зылды ветеранты советы сæрдар.
