Бабæрæг кодтой 190 ахуыргæнæндоны
Зынгсирвæзтыты ныхмæ домæнтæ куыд æххæстгонд сты, уый базоныны тыххæй радон рейд скодтой æнæнхъæлæджы уавæрты министрады цæгатирыстойнаг управленийы кусджытæ. Бабæрæг кодтой 190 ахуыргæнæндоны. Куыд сбæрæг кодтой, афтæмæй се ппæт скъолатæ ног ахуыры азмæ æххæстæй цæттæ не сты. Сæ разамонджытæн скодтой бæлвырд амынддзинæдтæ. 1-æмæй – 4-æм сентябры онг ведомствойы специалисттæ ногæй уыдзысты скъолаты æмæ скæндзысты профилактикон ахуыртæ. Темæйыл дарддæр радзурдзæн Гуытъиаты Алинæ.
Æппæты фыццаг бæрæг кæнынц, зынг цæмæй ахуыссын кæндзысты, уыцы фæрæзтæ. Хъуамæ уой æнцонбаххæссæн бынаты, уой рог æмæ æнцонархайæн. Иудзырдæй сæм хъуамæ ма уа фау æрхæссæн.
Зынгхуыссынгæнæн фæрæзтæй уæлдай ма хъуамæ бæстыхайæ æнæнхъæлæджы уавæры рæстæг уа æнцон рацæуæн. Дуæрттæ хъуамæ æнæкъуылымпыйæ гом кæной, уæлæмхасæн рацæуæн бынæттæм та хъуамæ уа æнцон бацæуæн. Алы уæладзыджы дæр хъуамæ уа эвакуацийы пълан. Цыппор цыппæрæм скъолайы уыцы домæнтæ æппæт дæр æххæстгонд æрцыдысты. Фæлæ дзы сбæрæг сты аиппдзинæдтæ дæр. Зæгъæм, даргъ тыргъты нæй дуæрттæ. Æнæ уыдонæй та зынг æнцонтæй апырх уыдзæнис бæстыхайыл. Директор зæрдæ бавæрдта, уыцы фарстайыл кæй бакусдзæнис, уымæй.
18 скъолайы, инспекторты хъуыдымæ гæсгæ, сæххæст кодтой æдасдзинады æппæт домæнтæ дæр. Ацы аз горæты администраци радих кодта дыууæсæдæ æхсай мин сомы, цæмæй зынгсирвæзты рæстæг фæдисы системæ сцалцæг кæной, уымæн. Ныртæккæ æнæнхъæлæджы уавæры рæстæг фæдисы сигнал уайтагъддæр бахæццæ вæййы æнæнхъæлæлжы цауты министрады хæстæгдæр хайадмæ.
Ныртæккæ уал æнæнхъæлæджы цауты министрады специалисттæ сбæрæг кодтой сæдæ нæуæдз астæуккаг ахуыргæнæндоны. Ведомствойы минæвæртты ныхæстæм гæсгæ, сеппæт скъолатæ не сты цæттæ ног ахуыры азмæ. Кæмдæрты нæй эвакуацийы фæрæзтæ, иннæ ран та æвзæр уавæры сты электрон хызтæ. Æппæт аиппдзинæдты тыххæй дæр эксперттæ радтой хæслæвæрдтæ, цæмæй сæ ног ахуыры азмæ аиуварс кæной, уый тыххæй.
Фыццæгæмæй цыппæрæм сентябрьмæ ведомствойы специалисттæ зилдзысты республикæйы скъолатыл æмæ бæрæг кæндзысты, æдасдзинады къабазы æппæт аиппытæ дæр аиуварс кодтой æви нæ, уый. Уымæй уæлдай араздзысты профилактикон ахуыртæ скъоладзаутæн æмæ ахуыргæнджытæн.
