Ныхас цыд нæ республикæйы артаджы æмæ энергетикон комплексыл
Цæгат Ирыстоны сæргълæууæг Битарты Вячеславы разамындæй арæзт æрцыд ведомствоты хсæн территориалон кусæг къорды æмбырд. Ныхас цыд нæ республикæйы артаджы æмæ энергетикон комплексыл. Æмбырды ма архайдтой æххæстгæнæн хицаудзинады оргæнты разамонджытæ, бæрнон организациты кусджытæ æмæ барадхъахъхъæнæг æмæ цæстдарæг оргæнты кусджытæ. Стыр æргом аздæхтой электрон тыхæн фиддонтæ æмбырд кæнынмæ, артаджы æмæ энергетикон комплексы куысты закъонхæлдтытимæ. Хицæн ныхас цыд Дзæуджыхъæуы хъармдæттæг хызты хæстæ фæкъаддæр кæныныл. Битарты Вячеслав куыд загъта, афтæмæй се ппæты хæс дæр у иумæйагæй архайын коммуналон лæггæдтæн фиддонтæ 100 %-мæ схæццæ кæнын. Ацы фарстайы фæстаг рæстæг цæуынц хуыздæрырдæм ивддзинæдтæ. Фæлæ комплексы уавæр фæхуыздæр кæнынæн нырма бирæ куыст ис. Республикæйы разамонæг Дзæуджыхъæуы æмæ районты сæргълæуджытæй бадомдта алы бон дæр уавæрмæ цæст дарын. Фиддонтæ куыд æмбырд кæнынц, уымæ кæсын æмæ цæрджытимæ бæстондæр кусын.
Æмбырды бæстон доклад скодта цæрæнуæтты-коммуналон хæдзарады, артаджы æмæ энергетикæйы министр Таматы Майрæн. Куыд загъта, афтæмæй дыккаг кварталы электрон тыхæн фиддонтæ сырæзтысты 4,2 %. Бюджетон организацитæ дæр сæ хæстæ сæххæст кодтой. Фæлæ ма бакусын хъæуы Алагиры æмæ Горæтгæрон районты. Цæрæнуæтты-коммуналон хæдзарады куыстуæтты фиддонты бæрц у 52,4%. Нысантæм гæсгæ та хъуамæ уой 67,7%. Хорз дæнцæг æрхæссæн ис Дзæуджыхъæуы дондзæуæн хызтæй. Уым фиддонты бæрц схызт 99,5%. Газæн та Цæгат Ирыстоны 2019-æм азы фыццаг æмбисмæ бафыстой 78% онг. Дзæуджыхъæуы хъармдæттæг куыстуаты иумæйаг хæс та у 4 млрд æмæ 670 млн сомы. Битарты Вячеслав бабар кодта хæстæгдæр рæстæг кусæг къорд саразын, æмæ уавæр бæстон равзарын.
