Ацы аз Дзæуджыхъæуы базилдзысты фæндæгты 34 километрмæ
Нæ республикæйы активонæй цалцæг кæнынц горæты уынгты фæндæгтæ. Ацы аз Дзæуджыхъæуы базилдзысты фæндæгты 34 километрмæ. Ууыл схардз кæндзысты 500 милуан сомæй фылдæр. Проект «городская агломерация» арæзт у 6 азмæ. Уый тыххæй проект «Хицауадимæ æргом ныхас» æххæст кæнгæйæ журналисттæн фехъусын кодта республикæйы фæндæгты хæдзарады комитеты сæрдар Солиты Тариэль. 2019-æм азы комитет бакусдзæн цалдæр егъау проектыл. Се хсæн стратегион ахсджиаг – Мæздæг æмæ Дзæуджыхъæу чи иу кæны, уыцы фæндаджы рацарæзт. Куыстытæ нæридæгæн райдыдтой. Ныхас цæуы 57 километрыл. Фæндаг байгом кæнынмæ хъавынц 2020-æм азы декабры. Æдæппæтæй фæндаджы арæзтадыл схардз кæндзысты 2 миллиард сомæй фылдæр. Ацы аз ма куыстытæ райдыдтой Архонкæйы дæр. Ам ныхас цæуы станицæйы иувæрсты цæуæг фæндагыл. Цалцæггонд ма цæуы Урухы цæугæдоны сæрты хид. Йе сног кæнын хъуыди раздæр дæр, загъта ведомствойы разамонæг. Ног хид фадат ратдзæн Дыгургоммæ туристон фæндаг байгом кæнынæн. Стыр куыст комитет кæны мониторинджы къабазы. Афтæмæй æргом здахы æппæт фæндæгты инфраструктурæмæ. Солиты Тариэль ма радзырдта, иннæ ведомствотимæ цы куыст кæнынц, стæй фидæнмæ нысанты тыххæй.
