Се хсæн – районы поликлиникæйы цы дохтыртæ нæй, ахæмтæ
Дыгуры район бабæрæг кодтой Дзæуджыхъæуы медицинон кусджытæ. Се хсæн – районы поликлиникæйы цы дохтыртæ нæй, ахæмтæ. Бирæ рынчынтæн у иунæг фадат, се нæниздзинад сбæрæг кæнынæн. Уæвгæ, ахæм балцытæ районтæм вæййынц афæдз дыууæ хатты. Бынаты равзарынц, кæй цавæр æххуыс хъæуы, уый. Иутæн сæ хъуыддаг саразынц сæхæдæг, иннæты та дарддæр арвитынц республикæйы медицинон куыстуæттæм. Касаты Наирæ радзурдзæн бæлвырддæр.
Невролог, травматолог, хъуырты æмæ хъусты дохтыр, тугдадзинты хирург. Ацы специалисттæм йе нæниздзинады уавæр сбæрæг кæныны тыххæй æрбацыди Хъесаты Ларисæ. Хъаст кæны бирæ хъуыддæгтæй. Гайморит, риссынц йæ къæхтæ, æмæ афтæ дарддæр. Цалдæр азы размæ сылгоймаг асаста йæ къах, æмæ йын раст нæ байгас. Хъæуы йын рентге скæнын. Уырдæм та йын хъуамæ дохтыр радта сæрмагонд гæххæт. Раздæр æй райсын уыди зын, уымæн æмæ дзы профилон специалист нæ уыди. Дохтыртæм цæуын хъуыди Æрыдонмæ.
Ларисæйы хуызæн дохтыры æххуыс кæй хъæуы, ахæм адæм æнæхъæн уæладзыг. Кæй хъæуы зæрдæйы дохтыр, чидæр йæ рагон низтæ дзæбæх кæны, кæйдæр та хъыгдарынц йæ улæфæнтæ. Дохтыртæ сын рафыссынц хостæ, стæй сæ консультацитæм арвитынц Дзæуджыхъæумæ.
Специалисттæ районтæм кæй цæуынц, уый бирæ рынчынтæн у иунæг гæнæн се нæниздзинад фæхуыздæр кæнынæн. Дыгуры районы поликлиникæйы кусынц иумæйаг практикæйы дохтыртæ. Уæззау æмæ тæссаг низтæ раиртасæн æнцон у, фæлæ дзы уæддæр хъæуы уавæртæ æмæ гæнæнтæ.
6 мæйы фæстæ Дзæуджыхъæуы дохтыртæ фæстæмæ бабæрæг кæндзысты Дыгуры район. Ацы хатт цы рынчынты æнæниздзинадмæ кастысты, уыдоны фендзысты ногæй. Стæй фæфылдæр уыдзæн специалистты номхыгъ дæр.
