Æрæджы ма Дур-Дуры фæзынди Уæлахизы парк, уый дæр Цалиты Сафарбийы хъæппæрисæй
Æрæджы Республикæйы Сæргълæууæг фембæлд Дыгуры районы цæрджытимæ. Адæм æм цыдысты цардархайды бирæ фарстатимæ. Иуты курдиæттæ Битарты Вячеслав алыг кодта бынаты, иннæтыл куыст цæуы æнæрлæугæйæ. Дур-Дуры хистæртæй иу, Фыдыбæстæйы Стыр хæсты ветеран Цалиты Сафарби республикæйы разамонæгмæ æрбацыди, хъæуы цæрджытæй фронтæй чи нал сыздæхти, уыдоны номыл цыртдзæвæнмæ базилыны тыххæй æххуысагуыр. Фронтовик йæхи хъаруйæ зилы монументмæ, аив ын кæны йæ территори. Уæвгæ йæ саразыныл кусытой æнæхъæн хъæуæй. Алы хæстоны ном дæр сæнусон кодтой къæйдурыл. Æмæ æрмæст уый нæ. Æрæджы ма Дур-Дуры фæзынди Уæлахизы парк, уый дæр Цалиты Сафарбийы хъæппæрисæй. Хъæуы хистæрма ма ис ноджыдæр фæндтæ æмæ нысантæ. Раргом сæ кодта не сфæлдыстадон къордæн дæр. Ныхасы бар Гуытъиаты Алинæйæн.
Фыдыбæстæйы стыр хæсты ветеран Цалиты Сафарби фыдыбæстæ хъахъхъæнджыты мемориалмæ цæуы æрвылбон. Бафснайы йæ алыварс, асыгъдæг æй кæны хæмпæлгæрдæгæй, иудзырдæй, зилы йæм, йæ бон куыл у афтæ. Цыртдзæвæн домы бындурон рацарæзт. Фæлæ уæддæр хъуамæ йæ алыварс æдзæллаг ма уа — зæгъы зæронд фронтовик.
Дур-Дурæй фронтмæ ацыд авдсæдæ адæймагæй фылдæр. Уыдонимæ Сафарби дæр. Йæ райгуырæн бæстæ хъахъхъæдта украинаг фронты, артиллерийы службæ кæнгæйæ. Уæлахизыл сæмбæлдис Венæйы. Хæсты фæстæ та архайдта æхсæнадон царды, æххуыс кодта йæ районы хъæууонхæдзарады райрæзты. Ныр дæр ма йæ зæрдыл ьлæуы, æхсайæм азты йæм цыртдзæвæн саразыны хъуыды куыд æрцыдис, уый. Уæд æрæмбырд кодта фæсивæд æмæ сын йæ хъæппæрис загъта.
Цыртдзæвæныл куыстой æнæхъæн хъæуæй. Æдзард хæстонты нæмттæ фыстой къæй дурыл. Æнхъæлдтой, хъæбартырты ном сæнусон кодтой. Абон та зæронд фронтовик йæ цæссыгкалгæйæ кæсы, монумент цы уавæры ис, уымæ.
Ныр дæр та, бирæ азты фæстæ, Сафарбийы сæр бахъуыдис. Республикæйы разамонæг Битарты Вячеславы фембæлды рæстæг хъæуы цæрджытимæ ногæй загъта йæ хъæппæрис, цæмæй снывыл кæной æрмæст дурдуйраг хæстонтæн цыртдзæвæн нæ, фæлæ иннæтæ дæр.
Кæддæр æрмæст ацы уынгæй хæстмæ ацыдис æртын адæймаджы. Фистæгæй иу араст сты Дигорайы æфсæддон къæмисарадмæ. Æрæджы хъæуы фæзындис уæлахизы парк. Уый дæр Цалиты Сафарбийы хъæппæрис уыдис. Фæнды йæ, цæмæй иунæнг хæстоны ном дæр рохуаты ма баззайа. Фронтовик кæд йæ æнусы юбилеймæ фæхæццæ кæны, уæддæр йæхи зæронд кæнын нæ уадзы. Ис æм бирæ бæллицтæ æмæ нысантæ. Парчы йæ фæнды сæвæрын хæсты заманы хæцæнгарз. Ныридæгæн уал ныффыста курдиат Уæрæсейы хъахъхъæнынады министрмæ.
