Ахæм уынаффæ хаст æрцыди Битарты Вячеславы разамындæй Проектон офисы æмбырды
Хæххон территориты бафæлварын дыргъдæтты куыст. Ахæм уынаффæ хаст æрцыди Битарты Вячеславы разамындæй Проектон офисы æмбырды. Республикæйы сæргълæууæг Хицауады сæрдары хæдивæг Сæбæтхъуаты Æхсарбегæн бахæс кодта, цæмæй Дæргъæвсы сбæрæг кæна фæзуат æмæ дзы ныссадзой фыццаг фæлварæн бæлæстæ. Уыимæ, Битарты Вячеслав загъта ацы къабазы райрæзтæн фæфылдæр кæнын хъæуы субсидитæ. Нымадмæ гæсгæ ныртæккæ иу гектарыл хардзгонд цæуы 210-220 мин сомы, фæлæ уыцы фæрæзтæ фаг не сты. Проектон офисы ма се ргом аздæхтой Уæрæсейы регионты фæлтæрддзинадмæ. Ома, талатæ байуарын хи хæдзæртты цæрджытыл æмæ тыллæг куы райсой, уæд сын сæ балхæнын. Нæ республикæйы 25 хæххон хъæуæн сæ бон у ацы куыст кæнын. Уымæ гæсгæ, æмбырды рахастой уынаффæ, цæмæй Горæтгæрон, Æрæфы æмæ Алагиры районты равзарой фæйнæ иу хъæуы,дыргъы куыст чи бафæлвардзысты . Бынат æвзаргæйæ специалисттæ хъуамæ се ргом аздахой æппæт фадæттæм: дондзæуæнтæм, техникæйæн бацæуыны фæндагмæ, стæй цæрджытæн сæхи фæндонтæм.
