Службæйы регионалон управленийы бахыгътой ацы азы 8 мæйы куысты бæрæггæнæнтæ
Республикæйы тæрхондæтты пъырыстыфтæ хæсджынтæй раздæхтой 1 миллиард æмæ 392 мин сомы. Службæйы регионалон управленийы бахыгътой ацы азы 8 мæйы куысты бæрæггæнæнтæ. Цы бæрæггæнæнтæ æрхастой, уыдонæй 393 милуан сомы сты кредитты ныхмæ, хъалонты фиддонтæ – 261 милуаны, республикæйы бюджетмæ та 156 милуан сомы, æххæстгæнæг æмбырдтæ 47 милуаны, куысты мызды фиддонтæ 31. Службæ фылдæр йе ргом здæхта алименттæ чи нæ фиды, уыдонмæ. Ацы статьямæ гæсгæ байстой 17 милуаны. Ацы хъуыддаджы фæдыл сæ куысты мыздæй уромынц 618 адæймагæн, æдæппæтæй 60 милуанæн. Электрон тыхы, газы æмæ хъармгæнæн системæйæ пайда кæныны тыххæй организациты пайдайæн ист æрцыди 289 милуаны. Фæндæгтыл æдасæй цæуыны паддзахадон автоинспекцийы административон ивартæ сты 100 милуанæй фылдæр. Республикæйы сæйраг пъырыстыф Къесаонты Игорь куыд загъта, афтæмæй ацы нымæц фаронимæ абаргæйæ фæфылдæр бирæ хатт.
