Бæрæгбоны мадзæлттæ цыдысты Дзæуджыхъæуы бирæ фæзты
Цæгат Ирыстоны цæрджытæ сбæрæг кодтой республикæйы æмæ горæты бон. Бæрæгбоны мадзæлттæ цыдысты Дзæуджыхъæуы бирæ фæзты. Уæрæсейаг æмæ бынæттон эстрадон зарæггæнджытæ, театралон, хореографион æмæ вокалон къордтæ барухс кодтой адæмы зæрдæтæ. Хицæн ныхасы аккаг – ирон чъириты æмæ цыхты фестиваль стæй «Ирон бæгæны»-йы конкурс. Дыууæ боны Штыбы фæзы куыста гом арвы бынмæ кинотеатр дæр. Бæрæгбон ахицæн ирд ахорæнтæй фейерверкæй. Уæвгæ, фехъусынæй фенын хуыздæр фæзæгъынц, æмæ бакæсæм ……æрмæгмæ.
245 азы сæххæст Цæгат Ирыстон Уæрæсеимæ куы баиу уæдæй, 235 азы размæ та бындур æвæрд æрцыдДзæуджыхъæуæн.
Республикæйы районты æмæ Дзæуджыхъæуы арæзт уыд бирæ зæрдæмæ дзæугæ мадзæлттæ. уæдæ цавæр бæрæгбон сфидаудзæн æнæ уæливыхтæ æмæ бæгæныйæ. Сæрмагонд фестивалы архайдтой куыд бынæттон, афтæ фæсарæнты цæрæг Сатанатæ.
Дыууæ бæрæгбоны фæдыл арæзт уыдысты алыхуызон мадзæлттæ, концерттæ. Байгом кодтой 15 ирхæфсæн бынаты. Се стырдæртæ уыдысты Хетæгкаты Къостайы номыл парчы, Сæрибардзинады æмæ Ленины фæзты. Уыд æфсæддон техникæйы æмæ рагон транспорты хуызты равдыст дæр.
Чи машинæтæ уарзы, кæмæн дæр та цымыдисаг уыд чингуыты армукъа фенын.
Хетæгкаты Къостайы номыл парчы уыцы иу рæстæг сарæзтой 2 мадзалы. Национ культурæты фестиваль «Хæлардзинады горæт» æмæ фæткъуыты фестиваль.
«Хæлардзинады горæты» сарæзтой хиконд аивадон дзаумæтты равдыст, фенæн дзы уыд Цæгат Ирыстоны цæрæг нациты традицитæ, саходын сæ национ хæринæгтæй. Ацы фæзуатæн æвдисæн уыд республикæйы сæргълæууæг Битарты Вячеслав дæр.
Сыхаг фæзуаты та фенæн уыд фæткъуыты фыццаг фестиваль. Ам сарæзтой дæсныйад æвдисæг ахуыртæ. Кæй фæндыд, уыдоны ахуыр кодтой фæткъуыйæ алы хуызон адджинæгтæ кæнын.
Ам ма адæмы бон уыд алы хуызон фæткъуытæй бахæрын æмæ зæрдæмæ кæцы фæцыд, уый балхæнын. Уымæй уæлдай дзы сарæзтой сывæллæтты нывты равдыст. Сæ темæ иу – фæткъуытæ.
Аивад уарзджытæн дæр æнкъард нæ уыд. Алы рæдтæй зæлыд музыкæ, зард æмæ кафты фестивальмæ дæр бирæтæ æрбацыд.
Зæгæъæн ис æмæ бæрæгбоны алчидæр ссардта зæрдæмæдзæугæ бынæттæ, райста удынцойдзинад, уыимæ та Дзæуджыхъæуы бæрæгбоны тæваг. Изæрæй та зындгонд артисттæ, уыдонимæ Уæрæсейы стъалы Алексей Чумаковы се сфæлдыстадæй раарфæ кодтой нæ республикæйы цæрджытæн.
Бæрæгбоны кæронбæттæн мадзал срæсугъд кодтой тæмæнтæ калгæ салюттæ
