Баст уыд Уæрæсе æмæ Гуырдзыйы хсæн ахастдзинæдтимæ
Нæ республикæйы Хæлардзинады Хæдзары арæзт æрцыд конференци. Баст уыд Уæрæсе æмæ Гуырдзыйы хсæн ахастдзинæдтимæ. Конференци саразыныл бакуыста Цæгат Ирыстоны гуырдзиаг æнæкоммерцион организаци «Единство-Эртоба». Фембæлдмæ æрбахуыдтой æппæтадæмон æхсæнадон организаци «Ирон адæмы уæлдæр совет»-ы, национ-культурон æхсæнадты æмæ нациты хсæн фарстаты фæдыл министрады минæвæртты. Сæрмагонд уазæг та дзы уыд экономикон наукæты доктор, профессор, Фонд «Единение русского и грузинского народов»-ы президент, «Гуырдзыстоны адæмты æппæтдунеон конгрессы» генералон секретарь æмæ «Уæрæсейы национ иугондты Конгрессы» президент Владимир Хомерики. Бæрнон кусæг загъта йæ хъуыдытæ конференцийы боны фæткы тыххæй. Куыд бафиппайдта, афтæмæй Советон Цæдис куы фехæлд, уæд уырыссаг адæм Гуырдзыйæ æндæр рæттæм цæуын райдыдтой. Ныртæккæ дзы цæры 60 мин адæймаджы Уæрæсейæ. Сæ адæмы хаттмæ гæсгæ æфхæрд не ййафынц. Уый нæ, фæлæ ма Гуырдзыйы цæрæг 80% сты Уæрæсеимæ бастдзинады фарс. Уый ныхмæ у æрмæст оппозици. Конференцийы ма куыд загътой, афтæмæй ацы фарстайы стыр ахадындзинад ис аргъуанæн. Уымæн æмæ чырыстон дин хъуамæ иу кæна дыууæ адæмыхатты минæвæртты.