Мадзал сарæзтой Адæмы иудзинады боны кадæн
Национ музейы кадджын уавæры схорзæхджын кодтой республикæйы алы къабæзты хуыздæр кусджыты. Мадзал сарæзтой Адæмы иудзинады боны кадæн. Культурæйы, промышленносты, æнæниздзинадхъахъхъæнынады, ахуырады æмæ æндæр къабæзты кусджытæн арфæ ракодта Цæгат Ирыстоны сæргълæууæг Битарты Вячеслав. Бузныг сын загъта сæ æнæзæрдæхудт фæллойы, стæй нæ республикæйы райрæзтмæ цы вæрæн бахастой, уый тыххæй. Республикæйы фæллойы хъæбатыры номæй схорзæхджын кодтой завод Победиты кусæг Николай Бердухойы. Фыдыбæстæйы раз сгуыхтдзинæдты тыххæй ордены дыккæгæм къæпхæны майдантæй схорзæхджын кодтой Зураты Ауызбийы, Дзгойты Валерийы, Кæсæбиты Хъазыбеджы, Пхалæгаты Сергейы, Тыбылты Таймуразы æмæ Кучиты Гарийы. Фыдыбæстæйы Стыр хæсты уæлахизмæ стыр æвæрæн кæй бахаста, уый тыххæй орден «Ирыстоны намысæй» схорзæхджын кодтой Дзæуджыхъæуы Рахизфарсы муниципалон зылды ветеранты советы сæрдар Гулуты Хизиры.
