Баст уыд, 77 азы размæ советон æфсæдтæ Дзæуджыхъæуы бынмæ немыцаг фашистты кæй ныппырх кодтой, уыимæ
«Ирыстон хæсты къæсæрыл». Ахæм сæргондимæ республикæйы ветеранты Советы Хæдзары уыд Гадзиаты Фузæйы чиныджы презентаци. Баст уыд, 77 азы размæ советон æфсæдтæ Дзæуджыхъæуы бынмæ немыцаг фашистты кæй ныппырх кодтой, уыимæ. Фыссæг чиныг сæмбырд кодта историон цаутæй æмæ архивон документтæй. Кæд знаг пырхгонд æрцыд, уæддæр ныры онг дæр арæх æмбæлынц уыцы тугкалæн хæсты æвдисæнтæ. Автор дзуры, республикæ бахъахъхъæнынæн цы мадзæлттæ арæзт цыди, уыдоны тыххæй. Уыимæ стыр æргом аздæхта промышленносты æмæ хъæууон хæдзарады рæзтмæ. Знаджы ныхмæ тох кодтой скъоладзаутæ, сылгоймæгтæ æмæ партизантæ. Бæстæзонæг-историкы чиныджы бакæсæн ис æппæт тохты тыххæй. Райдай Джызæлы операцийæ æмæ Суаргом хъахъхъæнджытæй фæуы. Гадзиаты Фузæ бæстон æрлæууыд кадджын паддзахадон хæрзиуджытыл, госпитальты куыстыл, стæй, æмтгæй райсгæйæ, нæ республикæйæн цы зиан æрхастой фашисттæ, ууыл. Хицæн сæргонды та ныхас цæуы хæстон намысы цыртдзæвæнтыл. Æнæмæлгæ лæгдзинад æмæ хъæбатырдзинад рох нæу, стæй нæ уыдзæн. Ахæм хъуыдыйыл хæст уыдысты, презентацимæ чи рбацыд, уыдон се ппæт дæр. Се хсæн: ветеранты Советы уæнгтæ, æхсæнадон организациты минæвæрттæ, студенттæ, скъоладзаутæ, Суворовон училищæйы курсанттæ, æвзонг æфсæддонтæ æмæ сабырдзинадтауджытæ.
