Ахæм уынаффæ хаст æрцыд фарон, Иры Стыр ныхасы æмæ Парламенты хъæппæрисмæ гæсгæ
Абон нæ республикæйы, Лæгты дзуармæ кувæн къуырийы кадæн, официалон æгъдауæй у фæлладуадзæн бон. Ахæм уынаффæ хаст æрцыд фарон, Иры Стыр ныхасы æмæ Парламенты хъæппæрисмæ гæсгæ. Сфидар æй кодта Цæгат Ирыстоны сæргълæууæг Битарты Вячеслав. Сæйраг нысан – кадджындæр национ бæрæгбонмæ, куыд æмбæлы, афтæ бацæттæ кæнын. Куыд æрвитынц абон сæ бон Дзæуджыхъæуы цæрджытæ, уый тыххæй радзурдзæн Фидараты Маринæ.
Раздæр уал бакус, уый фæстæ та – дæ фæллад суадз. Ахæм хъуыдыйыл хæст у Сабеты Сослан. Фæндаг аразыны рæстæг бацыд йæ тæмæны. Тракторыл кусæг куыд зæгъы, афтæмæй бæрæгбон алчидæр уарзы, фæлæ дæ размæ æвæрд хæстæ хъæуы афоныл бакæнын.
Ирон адæмы сæйраг национ бæрæгбон ныр дыккаг аз официалон æгъдауæй нæ республикæйы у фæлладуадзæн бон. Алкæмæн дæр фадат ис, куыд æмбæлы, афтæ йæм баццæттæ кæнынæн, æмæ йæ сбæрæг кæнынæн. Ирыстоны нæлгоймæгтыл аудæджы номыл бæрæгбонмæ се ппæтæн дæр ис уæлдай цæстæнгас. Уымæн ирд æвдисæн бæрæгбоны фынгтæ. Хуымæтæг, фæлæ традицитæ хынцгæйæ. Фынгыл, æнæмæнг, дзидза стуры кæнæ фысы. Æндæр фосы фыд, суанг карчы онг ацы къуыри хæрæн нæй.
Ацы бонты адæм, кæй зæгъын æй хъæуы, фылдæр æлхæнынц стуры дзидза. Уæлдайдæр та æртæ фæрсчы. Дзидзайы куыст чи кæны, уый баххуыс кæндзæн хæрзхъæд продукци равзарын.
Лæгтыдзуармæ кувæн къуыри æнæ цыхтæй не сфидаудзæн. Хæдзары фсинтæ рагацау ахъуыды кæнынц ууыл. Æмæ се ртæ кæрдзынæн балхæнынц фæлмæн цыхт.
Абон горæты сæйраг хайы бирæ адæм нæй. Сæ фылдæр сты сæ хæдзæртты, сæхи цæттæ кæнынц бæрæгбонмæ. Фæлæ, стыр уынджы йæ бинонтимæ атезгъо кæнын кæй бафæндыд, ахæм адæм дæр разынд.
Абон кусынц паддзахадон организациты, æмæ æхсæнадон транспорты кусджытæ дæр. Фæлæ уыдонæн дæр у цыбыр кусгæ бон, цæмæй сæ уарзон бинонты хсæн ацы рæсугъд æмæ кадджын бæрæгбон сбæрæг кæной, уый тыххæй.
