Фыццаджыдæр фембæлд регионы Сæргълæууæг Битарты Вячеславимæ.
Республикæмæ кусæг балцы ссыди УФ-йы фæсарæйнаг хъуыддæгты фæдыл министрады инспекцион къорды разамонæг Александр Пацев. Фыццаджыдæр фембæлд регионы Сæргълæууæг Битарты Вячеславимæ. Æмбырды архайдтой, Цæгат Ирыстоны ацы къабазмæ бар чи дары, ахæм бæрнон кусджытæ дæр. Битарты Вячеслав куы загъта, афтæмæй Цæгат Ирыстон нациты хсæн ахастдзинæдты стыр æмæ ахадгæ куыст кæны. Æрмæст фæстаг аз нæ республикæ бабæрæг кодтой Ираны, Францийы, Швейцарийы, Финляндийы, Польшæйы, Сомихы, Азербайджаны, Грекъы, Кипры æмæ æндæр бæстæты минæвæрттæ æмæ дипломаттæ. Уымæй уæлдай, культурæ æмæ аивады къабазы арæзт цæуынц æппæтадæмон егъау мадзæлттæ. Хорз æнтыстдзинæдтæ ис наукæйы, ахуырады, хъæууон хæдзарады æмæ спорты къабæзты дæр. Раппæлинаг у, фæсарæнты чи цæры, уыцы æмзæххонтимæ, ахастдзинæдтæ фидар кæныны республикон программæтæ куыд æххæстгонд цæуынц, уый дæр. Александр Пацев дæр йæхи рдыгæй бузныг загъта, Дзæуджыхъæуы сæ минæварадæн алывæрсыг æххуыс кæй цæуы, уый тыххæй. Бæрнон кусджытæ æрныхас кодтой РЦИ-А 2019-æм азы æппæтадæмон æмæ æддагон экономикон бастдзинæдты хатдзæгтыл. Битарты Вячеслав куыд загъта, афтæмæй республикæйæн уæззау рæстæджыты фæсарæйнаг хъуыддæгты министрад бакодта ахадгæ æххуыс. Уый ирдæй зынди Беслæны террористон акты фæстиуджытæ иуварс кæныны хъуыддаджы дæр. Уæд, Дзæуджыхъæуы аэропорты байгом кодтой консулады рæстæгмæйы пункт, æмæ дзы суткæйы дæргъы визæтæ лæвæрдтой, гуманитарон æххуыс чи ласта, уыдонæн. Ирыстоны цæрджытæ стыр æххуыс банкъардтой, Хъолайы цъити куы ратыдта, уæд, æмæ Хуссар Ирыстоны 2008-æм азы хæстон цауты рæстæг дæр. Республикæйы разамонæджы ныхæстæм гæсгæ, минæварадимæ цæуы æнгом æмгуыстад, уый фæрцы афоныл исæм æддагон экономикон архайд фæхъомысджындæр кæнынæн амынддзинæдтæ. Зæгъын хъæуы уый дæр, æмæ Дзæуджыхъæуы арæзт æрцыди 24 æппæтадæмон мадзалы, æмæ дзы архайдтой Турчы, Абхазы, Гуырдзыйы, Узбекистаны, Болгарийы, Израилы, Словакийы, Италийы, Канадæйы, Бельгийы æмæ бирæ æндæр бæстæты минæвæрттæ.
