Проект «Ираф-Медиа» æххæст кæнгæйæ, журналистикæйы фæлтæрдджын специалисттæ кæсынц зонадон лекцитæ.
Абон Цæгат Ирыстоны Паддзахадон университеты журналистикæйы факультеты арæзт æрцыд ахуырадон мадзал. Проект «Ираф-Медиа» æххæст кæнгæйæ, журналистикæйы фæлтæрдджын специалисттæ кæсынц зонадон лекцитæ. Студентты размæ хæссынц ныры рæстæджы ахсджиаг темæтæ. Цавæртæ, уый тыххæй радзурдзæн Джыбызты Зæринæ.
-«Трэвел -журналистика», «Медиамаркетинг», Фактчекинг», Уыцы ныхæстæ хъуыстгонд сты, нырыккон журналистикæмæ æмхиц чи у, уыцы адæмы хсæн. Æнæмæнг хъæугæ кæй сты ацы хъуыддæгтæ фидæны журналисттæн дæр, уый æмбарынц Цæгат Ирыстоны паддзахадон университеты журналистикæйы факультеты. Уый хынцгæйæ, Цæгат Кавказы фæсивæдон форум «Машук -2019»-ы проектмæ гæсгæ фæзынд фадат ацы хъуыддæгтæ фæхæццæ кæнынæн, кæй фæнды, уыдонмæ.
Проект «Ираф Медиа»-йы автор, республикæйы фæсивæды комитет, ЦИПУ-ы журналистикæйы факультет, стæй паддзахадон телерадиокомапани «Алани» æмæ национ телекомпани «Ирыстон» фарсхæсты фæрцы разæнгардæй бавнæлдта йæ хъуыдытæ царды уадзынмæ.
Проекты нысан у Æрæфы районы æрдзон рæсугъддзинæдтæ, цымыдисаг историон цыртдзæвæнтæ, районы разагъды адæмты тыххæй хабæрттæ кæнын, интернеты фæрцы, дунейы цæрджытæн. Уыимæ ма дзы фæнд кæнынц аразын фæсивæды зондахастæн пайдайаг æрмæджытæ. Журналистикæйы фæкультеты арæзт мадзал у проекты къæпхæнтæй иу. Хуынд æм æрцыдысты уазджытæ дæр. Парламенты депутат йæ раныхасы фæрцы семинары архайджытæн радта сæрмагонд сертификаттæ.
Семинар саразыны темæтыл бакуыстой Цæгат Ирыстоны журналистикæйы факультеты декан Хæбæлаты Фатимæ , стæй доценттæ Дзабиаты Эльбрус æмæ Бабочиты Мæдинæ. Проекты сæйраг нысан у фæсивæды ргом райгурæн бæстæйы культурæ æмæ адæмон хæзнатæм здахын, аргъ сын кæнын æмæ сæ бахъахъхъæнын.
