Бабæрæг сæ кодта республикæйы Сæргълæууæг Битарты Вячеслав.
Мæздæджы æмæ Кировы районтæ хатдзæгтæ кæнынц сæ афæдзы куыстæн. Бабæрæг сæ кодта республикæйы Сæргълæууæг Битарты Вячеслав. Алы къабæзты хуыздæр кусджытæн ракодта арфæтæ. Республикæйы разамонæгæн йæ кусæг балц райдыдта Мæздæджы районæй. Уым бабæрæг кодта сидзæрты хæдзар æмæ бæрæгбоны арфæтæ ракодта йæ хъомылæнинæгтæн. Уыдон та уазджытæн бацæттæ кодтой бæрæгбоны концерт. Кусæг балцы тыххæй бæлвырддæр радзурдзæн Касаты Наирæ.
Ног азы зарæг кадджын уазджытæн. Сидзæр сывæллæтты хæдзары хъомылгæнинæгтæ Битарты вячеславыл сæмбæлдысты бæрæгбоны зæрдæйы ахастимæ. Заз бæласы бын регионы разамонæгæй лæвæрттæ. Йæхицæн та йын рæзгæ фæлтæр бацæттæ кодтой сæхи къухæй кæй скодтой, ахæм æнæнхъæлæджы лæвар. Битарты Вячеслав арфæ ракодта Ног азы фæдыл. Уый фæстæ, фембæлд Мæздæджы районы активисттимæ. Йе ргом аздæхта 2019-æм азы цы куыстытæ конд æрцыди районы, уыдонмæ. Зæрдыл æрлæууын кодта, ног арæзт æмæ цалцæггонд социалон объектты нымæц. Битарты Вячеслав куыд загъта, афтæмæй бирæ хъуыддæгтæ къухы бафтыдысты цæрджытимæ æмархайды фæрцы.
Битарты Вячеславы къухæй кады гæххæттытæ райстой Кировы районы цæрджытæ дæр. Сæ бирæ азты æнæзæрдæхудт фæллойы тыххæй хорзæхджын æрцыдысты хъæууон хæдзарады, культурæйы, ахуырады æмæ æнæниздзинадхъахъхъæнынады кусджыты. Цъебойты Фатимæ Кировы районы рынчындоны кусы 10 азæй фылдæр. У сывæллæтты дохтыр. Райста арфæйы фыстæг. Куыд зæгъы, афтæмæй йын уый у республикæйы цур уæлдай бæрнондзинад.
Йæ кады гæххæт райста æвзонг нывгæнæг Бететы Дамир дæр. Лæппуйæн ныридæгæн дæр уыди иу равдыст. Уарзы портреттæ фыссын. Уæдæ конкурсы дæр рамбылдта. Республикæйы Сæргълæууæгæй лауреаты диплом райсын Дамирæн уыди йæ рагон бæллиц.
Елхоты бахыгътой муниципалитетты афæдзы куысты хатдзæгтæ дæр. Рейтинджы сæргъы Кировы район. Муниципалон сконды разамонæг Нæкуысаты Барисæн Битарты Вячеслав радта 10 милуанæн сертификат. Дыккаг бынат æмæ 5 милуанæн сертификат райста Æрыдоны район. Æртыккаг бынаты æмæ 3 милуаны аккаг сси – Горæтгæрон район. Конкурсы фæткмæ гæсгæ муниципалитетты аргъ кодтой цалдæр домæнмæ гæсгæ. Фылдæр æргом здæхт цыди социалон-экономикон рæзты бæрæггæнæнтæм. Уымæй уæлдай, цæгат Ирыстон ацы аз, фыццаг хатт архайдта æппæтуæрæсейон конкурс «Лучшая муниципальная практика»-йы. Æрыдоны районы хъæу Красногор бахауди Уæрæсейы 10 хуыздæр цæрæнбынаты хыгъдмæ.
