Хъæуы сын ис цыртдзæвæн, фæлæ адæмы хъуыдымæ гæсгæ сæ æдзард æмхъæуккæгты аккаг нæу
Сырх-Дыгуры цæрджытæ хицауадмæ бахастой курдиат, Фыдыбæстæйы Стыр хæсты хъæбатырты ном сæнусон кæныны тыххæй. Хъæуы сын ис цыртдзæвæн, фæлæ адæмы хъуыдымæ гæсгæ сæ æдзард æмхъæуккæгты аккаг нæу. Сырх-Дыгуры уыди не сфæлдыстадон къорд дæр, æмæ темæ дарддæр хæццæ кæны Касаты Наирæ.
Сырх Дыгуры цæрæг Бузойты Артем архайы историон цауты цыд сног кæныныл. Йæ райгуырæн хъæу, Фыдыбæстæйы Стыр хæсты рæстæг уыди фашисттæн Фæскавказмæ ацæуыны бар кæм нæ радтой, ахæм бынат. Æрджынарæджы, Суаргомы æмæ Ацы бынæтты уыдис æппæты карздæр тохтæ.
Кавказыл тохы ацы гыццыл хъæу равдыста стыр сгуыхтдзинад. Немыц архайдтой æппæты уæлдæр хъæу уацары райсыныл. Цæмæй уый сæ къухы ма бафта, уый тыххæй бирæ советон салдаттæ фæмрд сты. Æфсымæрон ингæны æнустæм сты сæдæгай æфсæддонты стæгдартæ.
Иу хъæуы цалдæр æфсæддоны, æппæты уæлдæр æмвæзадыл хæрзиуджыты аккаг чи сты, ахæмтæ. Намысы ордены æххæст кавалер Хъалаты Семен, намысы 2 ордены хицау у Гæбуты Гуыбе дæр. Хъæуы цæрджытæ скодтой алыдæр, цæмæй ам зындзинæдтæ нæ хынцгæйæ йæ къахыл слæууын кæной адæмон хæдзарад. Иу афæдзмæ райстой Ленины 11 ордены. Уый, иннæ хæрзиуджытæ нæ нымайгæйæ. Хъæуы ис Фыдыбæстæйы Стыр хæсты хъæбатыртæн цыртдзæвæн. Фæлæ бынæттон цæрджыты хъуыдымæ гæсгæ хъуамæ уа аивдæр æмæ стырдæр.
Уæвгæ ам æрмæст цыртдзæвæн нæ хъæуы. Бынат хъæуы быруйæ сæхгæнын. Стæй дзы хорз уаид аивгæнæн куыстытæ скæнын дæр.
Курдаитмæ йе ргом раздæхта скулптор Соскъиты Владимир. Проект ныридæгæн у цæттæ. Активистты ныхæстæм гæсгæ, цæттæ у куыстытæ лæвар бакæнынмæ. Владимирæн дæр ацы хъæу у йæ райгуырæн. Къуылымпы кæны уый, æмæ кусæн æрмæджытæ иууылдæр хъæуы æлхæнын. Адæм баххуыс кæныны тыххæй курдиæттæ арвыстой районы æмæ республикæйы разамындмæ. Ныр æнхъæлмæ кæсынц, сæ арфæйг фæндон царды æххæстгонд кæй æрцæудзæн, уымæ.
