Паддзахады Сæргълæууæг æнæ *рхъуыдыйæ нæ ныууагъта сывæллæтты пособитæ дæр
Владимир Путин йе рвылазон ныстуаны бахаста мадæлты капитал фыццаг сывæллонæндæр дæттыны фæндон. Паддзахады Сæргълæууæг æнæ *рхъуыдыйæ нæ ныууагъта сывæллæтты пособитæ дæр. Сæ бæрц фæфылдæр уыдзæни, æмæ 3 азæй 7 азы онг кæуыл цæуы, уыцы сабитæ ифтонг уыдзысты фиддонтæй. Ногдзинæдтыл нырма хъæуы бакусын. Ныртæккæ та уал Цæгат Ирыстоны æрыгон бинонтæн цы æххуыс цæуы, уый тыххæй радзурдзæн Джыбызты Зæринæ.
Паддзахадыл дæ зæрдæ дар, фæлæ кусын дæр ма рох кæн. Ахæм хъуыдыйыл хæст у æртæ сывæллоны мад Маликъиты Еленæ. Йæ бинойнагимæ рагæйдæр бæллыдысты стыр бинонтæ скæнынмæ. Фæлæ сæ зæрдæ æрмæст паддзахады æххуысыл нæ дардтой. Фæлæ уæддæр алы азты социалон фиддонты æмвæзад бафиппайдтой, æмæ йын скодтой аргъ.
Социалон фиддонтæ кæй фæфылдæр сты, уый фæрцы республикæйы демографийы уавæр зынгæ фæхуыздæр ис.
Хорз скъолайы ахуыр, уый фæстæ профилон предметтæй репетитортæ, канцтовартæ, уæлæдарæс, хæринаг, фæлладуадзæн рæстæг… Цæмæй æртæ сывæллоны алцæмæйдæр сифтонг кæнай, уый тыххæй ныййарджыты кусын хъæуы æнæ фæлладуадзæн бонтæй. Паддзахад сывæллонмæ кæсынæн цы рæстæг дæттынц, уымæй спайда кæнын дæр бирæты бон нæу, хъæуы сæ кусын, цæмæй сæ цоты дарой.
Æрыгон бинонтæ сæхи хæдзар балхæдтой ныййарæджы капиталы фæрцы. Фæлæ ам та сæ размæ сæвзæрд æндæр къуылымпыдзинад. Фатер ауæй кæнын сæ бон нæу, цалынмæ сывæллоныл 18 азы сæххæст уа, уæдмæ. Уымæ гæсгæ, стыр бинонтæн сæ бон уæрæхдæр хæдзар балхæнын нæу, уымæн сæм нæй уæлæмхасæн фæрæзтæ. Иу уаты фондзæй цæрын та у къуындæг.
Пенсион Фонды специалисттæ зæгъынц, гæнæн ис, æмæ мадæлты капиталы закъоныл бакусдзысты ногæй. Ныртæккæ та уал фæрæзтæй цæрæнуат балхæнын у æппæтæй ахадгæдæр. Ома, адæмæн дзы сæ фылдæр спайда кæнынц уыцы хъуыддагæн.
УФ-йы Президент Владимир Путин йе рвылазон ныстуаны мадæлон капитал 616мин сомы онг фæфылдæр кæндзæн зæгъгæ куы загъта, уæдæй нырмæ, Пенсион Фонды хайадмæ цæуынц сæдæгай курдиæттæ, фæнды сæ хъуыддаг бæлвырддæр базонын. Фæлæ уал нырма ног фиддонты механизмы уавæртæ æмæ фадæттæ специалисттæн сæхицæн дæр зонгæ нæма сты. Закъонывæрынадмæ ивддзинæдтæ хаст æрцæудзысты хæстæгдæр рæстæг.
