Æрæджы асасти йæ сины стæг, æмæ йын йæ клиникæйы операци скодта хирург-ортопед Кудзаты Хъазыбег
Фыдыбæстæйы Стыр хæсты ветеран Зæнджиаты Валерийыл цæуы 104 азы. Æрæджы асасти йæ сины стæг, æмæ йын йæ клиникæйы операци скодта хирург-ортопед Кудзаты Хъазыбег. Ныртæккæ цæуы реабилитаци. Зæнджиаты Валерийы Цæгат Ирыстоны зонынц æрмæст куыд хæсты хъæбатыры нæ, фæлæ ма куыд аивады ирд архайæджы. Разамынд лæвæрдта Садоны шахтерты зард æмæ кафты ансамблæн. Уый ивгъуыд æнусы 60-йæм азты хъуыстгонд уыди Советон Цæдисы алы рæтты. Иу дзырдæй – æнусы дæргъы цымыдисаг цардвæндаг.
Ахæм хуызы реабилитаци цæуы 104 аздзыд пациент, фронтовик Зæнджиаты Валерий. Операцийы фæстæ дыккаг бон слæууыди йæ къæхтыл, æмæ ма суанг йæ палатæйы арацу-бацу кодта.
Кудзаты Хъазыбеджы практикæйы Валерий у æвдæм пациент, 100 азæй уæлæмæ кæуыл цæуы, ахæм. Арæх ацы клиникæмæ æрбаласынц ацæрæг адæмы сины састимæ. Ам æвæрд æрцыд дунеон рекорд дæр. Хирург операци скодта 114 аздзыд сылгоймагæн. Æмæ ма уый фæстæ фæцарди 8 азы. Операци цæуы 25 минуты, æмæ йæ фæкæнынц бынæттон наркозимæ. Ветераны фарсмæ кæддæриддæр ис йæ бинойнаг. Иумæ цæрынц 46 азы. Арæх æм æрбацæуынц йæ цот æмæ уыдоны кæстæртæ. Æмæ сын Зæнджиаты Валерий кæддæриддæр ссары рæстæг æмæ хъарутæ, цæмæй та сын радон хатт радзура дисы фтауæг историтæ, æмæ йе нусон цардæй ист цымыдисаг хабæрттæ. Уыдон та хæствæллад хистæрмæ, кæй зæгъын æй хъæуы, бирæ сты.
