Уыимæ Цæгат Ирыстоны дæр
Фыдыбæстæйы Стыр хæсты уæлахизы 75 азы бонмæ мадзæлттæ ныридæгæн дæр райдыдтой нæ бæстæйы. Уыимæ Цæгат Ирыстоны дæр. Раздæр уал бавнæлдтой æфсымæрон ингæнты, цыртдзæвæнты æмæ мемориалты аивгæнæн куыстытæм. Ахæм зæрдылдарæн бынæттæ ис нæ республикæйы алы районы дæр. Ацы хатт уал федтам Рахизфарсы районы цыртдзæвæнты уавæр. Алкæцыдæр сæ дисы фтауы йæ бирæазон историйæ. Фидараты Маринæ радзурдзæн дарддæр.
Фондзтигъон стъалыйæн цыртдзæвæн. Фарныхъæуы ныгæд сты 14 салдаты, Фыдыбæстæйы Стыр хæсты рæстæг хъæбатырæй чи фæмард, уыдон. Се хсæн сырхæфсæддон Валерий Яковлев. Хаст æрцыд Советон Цæдисы Хъæбатыры ном райсынмæ.
Фарныхъæуы бынæттон администрацийы сæ зæрдæ дарынц, æфсымæрон ингæн кæй рацараздзысты, нысанмæ арæзт программæмæ гæсгæ, ууыл. Рахизфарсы районы Стыр уæлахизы 75 азы кадæн уыцы-иу рæстæг сцалцæг кæндзысты цалдæр цыртдзæвæны.
1942-æм азы Ног Бæтæхъойыхъæуы сæрмæ æрæппæрстой хæдтæхæг. Советон тæхджытæ Веткин, Шеманский æмæ Хъантемыры-фырт ныгæд æрцыдысты хъæугæрон. 1967-æм азы сæ ногæй баныгæдтой. Сырхæфсæддонты ингæнтæ рахастой хъæуы астæумæ.
Бирæ азты дæргъы Зилгæйы æфсымæрон ингæн аив кæнынц сæхи хъарутæй. Муниципалитет фæнд кæны ацы бынаты радон егъау куыстытæ бакæнын.
Цыртдзæвæнты æмæ æфсымæрон ингæнты рацарæзт уый у Фыдыбæстæйы Стыр хæсты Уæлахизы 75 азы бонмæ цæттæгæнæн мадзæлттæй иу. Уыимæ – сæйрагдæр. Рæхджы сбæрæг кæндзысты фыццаградон базилинаг объекттæ, æмæ сæм æвæстиатæй бавналдзысты.
