Цæгат Ирыстоны паддзахадон университеты наукон библиотекæйы фойейы уый кадæн арæзт æрцыд къамты равдыст
80 азы Ирыстоны кадджын фырты райгуырдыл. Ацы бонты Цæгат æмæ Хуссар Ирыстоны мысынц адæмон поэт Джыккайты Шамилы рухс ном. Цæгат Ирыстоны паддзахадон университеты наукон библиотекæйы фойейы уый кадæн арæзт æрцыд къамты равдыст. Ирдæй дзы равдыстой ахуыргонд-филологы цардвæндаг. Джыккайты Шамил у 6 поэтикон æмбырдгонды, бирæ наукон уацты, ирон æвзаг æмæ литературæйы программæты автор. Уымæй дарддæр уыд зындгонд æхсæнадон архайæг. Хъуыстгонд ахуыргонды рухс ном æрымысынмæ æрбацыдысты униыерситеты студенттæ, ахуыргæнджытæ, Ирыстоны фысджыты Цæдисы уæнгтæ, профилон министрады минæвæрттæ, æмæ, кæй зæгъын æй хъæуы, Джыккайты Шамилы сфæлдыстадæн æгæрон аргъ чи кодта, уыдон. Фæстаг азты Шамил куыста Цæгат Ирыстоны паддзахадон университеты ирон филологийы факультеты деканæй. Йæ цард æвирхауæй аскъуыд фыдгæнæджы къухæй 26-æм майы 2011-æм азы.
