Хорз æрхъудыдзинадыл банымайæн ис, гом арвы бын цы Æфсæддон-историон Музей «Барбашовы фæз» арæзт æрцыд, уый
Фылдæр гæнæнтæ нæ хистæрты сгуыхтдзинæдты хабæрттæ фæлтæртæм хæццæ кæнынæн. Хорз æрхъудыдзинадыл банымайæн ис, гом арвы бын цы Æфсæддон-историон Музей «Барбашовы фæз» арæзт æрцыд, уый. Уымæн, радон хатт, æвдисæн у Дзæуджыхъæуы 65–æм рæвдауæндоны хъомылгæнинæгтæн цы экскурси сарæзтой, уый. Рæвдауæндоны директор Чертхъоты Людмилæ, хъомыгæнджытæ Тауытты Ларисæ æмæ Битарты Маринæ æнæзивæгæй, сæ фæлладуадзæн бон, сывæллæтты акодтой Барбашовы фæзмæ. Уым сын радзырдтой ацы ранмæ хæст куыдæй æрбахæццæ, стæй Петр Барбашовы хъæбатæрдзинады тыххæй. Сабитæ æмæ сæ ныййарджытæ цымыдисæй хъуыстой æппæт мысинæгæм дæр. Базонгæ сæ кодтой фæзы æппæт цыртдзæвæнтимæ дæр, радзырдта сын алкæйы нысаниуæджы тыххæй дæр. Уыимæ хъæбатырты аллеяйы цы Ирыстоны сахъгуырдты къамтæ ис, уыдоны хæстон хабæрттимæ дæр. Лаппутæн æмæ чызджытæн уæлдай æхсызгон уыд æфсæддон техникæйы хуызтимæ базонгæ уæвын. Алкæйы историмæ байхъуысгæйæ, се ппæтимæ дæр систой къамтæ. Ацы сабитыл кæд 6-гай азтæ цæуы, уæддæр ацы патриотон хъомыладимæ баст мадзал сæ зæрдæтыл кæй бадардзысты, уый бæрæг дардта сæ цымыдисдзинадæй алы экспонатмæ дæр.
