Æрдзырдтой коронавирусы инфекцийы ныхмæ æмгуыстады фарстатыл
Республикæйы сæргълæууæг Битарты Вячеслав видеобастдзинады фæрцы аныхас кодта республикæйы æнæниздзинадхъхъахъхъæнынады министр Годжысаты Тамерлан æмæ рынчындæтты сæргълæуджытимæ.
Архайдта дзы республикæйы хицауады сæрдар Тускъаты Таймураз. Æрдзырдтой коронавирусы инфекцийы ныхмæ æмгуыстады фарстатыл. Ныртæккæ низ ноджы тынгдæр парахат кæны, уымæ гæсгæ, чи зоны æмæ бахъæудзæн районты дохтырты æххуыс дæр. Республикæйы сæргълæууæг фæсидт поликлиникæты разамонджытæм, цæмæй фылдæр æргом здæхт цæуа, чи фæрынчын, фæлæ хæдзары дзæбæхгæнæн кæмæн ис, уыцы адæммæ. Хицæн ныхас уыд дохтырты æдасдзинадыл. Абоны бонмæ уал ифтонг сты хъæугæ фæрæзтæй, хостæ дæр ис. Битарты Вячеслав загъта, кæй хъæуы республикæйы хуыйæн фабриктæм фæсидын, цæмæй райдайой маскæтæ æмæ дохтырты сæрмагонд уæлæдарæс хуыйын.
Ноджы ма фæсидт æнæниздзинадхъахъхъæнынады министрмæ, цæмæй медицинон куысджытæ сæ фиддонтæ исой æнæкъуылымпыйæ. Кæронбæттæны республикæйы сæргълæууæг фæсидт æмбырды архайджытæм, цæмæй адæмимæ фылдæр кæной низы тыххæй æмбарынгæнæн куыст.
