Цæгат Ирыстонæй дзы хуыздæртыл нымад æрцыдысты дыууæ ахуыргæнæндоны
Зæрдыл дарын æмæ кад кæнын. Парти «Иугонд Уæрæсе»-йы минæвæрттæ кад кодтой Æппæтуæрæсеон конкурсы уæлахиздзаутæн. Сæ экспозицитæ сæм бацæттæ кодтой Фыдыбæстæйы Стыр хæсты историимæ баст скъолаты музейтæ. Цæгат Ирыстонæй дзы хуыздæртыл нымад æрцыдысты дыууæ ахуыргæнæндоны. Беслæны æмæ Мæздæджы районы Киевскæйы скъолатæ.
Беслæны скъолайы ахуырдзаутæ се ргом аздæхтой нæ бæстæйы истори базонынмæ. Фыдыбæстæйы Стыр хæсты рæстæг танкты модельтæ æмæ хæстон хæрзиуджытæ бындуронæй базыдтой, скъолайы музейы экспонаттæм гæсгæ. Хъæздыг коллекци хуыздæрыл банымадтой Æппæтуæрæсеон конкурс «Фыдыбæстæйы Стыр хæсты номарæн хуыздæр скъолайы музей»-ы. Бакуыста йыл парти Иугонд Уæрæсе. Беслæны скъола дзы бацахста дыккаг бынат, номинаци «Горæты музей»-ы.
Скъолайы ис 8 залы экспонаттимæ. Баст сты нæ бæстæйы историйы ирддæр цаутимæ. Фæлæ конкурс саразджытæ се ргом фылдæр аздæхтой Фыдыбæстæйы Стыр хæсты музеймæ. Партийы регионалон хайады минæвæрттæ директорæн æмæ музейы разамонæгæн кадджын уавæры радтой сертификат 300 мин сомæн, стæй призон бынаты тыххæй диплом.
Музей фæзынди 2 минæм азты райдиан. Фæлæ цы æвирхъау теракт æрцыд, уый сын уæд сæ хъуыдытæ царды рауадзын нæ бауагъта. Куыстытæм ногæй бавнæлдтой 2015-æм азы. Стыр Уæлахизы 75 азы кадæн та ам байгом сæрмагонд равдыст.
Цы фæрæзтæ рамбылдтой, уыдонæй скъолайы сног кæндзысты стендтæ æмæ байгом кæндзысты ног зал.
Конкурсы призер ма сси Мæздæджы районы Киевскæйы хъæуы скъола дæр. Уый бацахста æртыккаг бынат номинаци «Хъæуккаг музей»-ы. Призон бынатæн скъола райсдзæн 200 мин сомы.
