Республикæйы сæргълæууæг куыд бафиппайдта, афтæмæй сæ ведомство 2020-æм азы дæр хорз бакуыста, æмæ уыцы куыст хъæуы дарддæр æххæст кæнын
2021-æм азы, социалон нысаниуæг кæмæн ис, уыцы ахджиаг объектты арæзтадæн подрядон организацитæ хъуамæ сбæрæг кæной конкурсмæ гæсгæ. Уыцы конкурс та хъуамæ арæзт æрцæуа æмгъуыдмæ гæсгæ. Уый тыххæй ныхас цыд республикæйы сæргълæууæг Битарты Вячеславы æмæ, паддзахады хардзæй æлхæдтытæн республикон Управленийы разамонæг Аккæлаты Алыксандры кусæг фембæлды. Битарты Вячеслав куыд бафиппайдта, афтæмæй сæ ведомство 2020-æм азы дæр хорз бакуыста, æмæ уыцы куыст хъæуы дарддæр æххæст кæнын. Национ проекттæ æххæст кæнгæйæ, цы объекттæ арæзт цæудзысты, уыдоны нымæц бирæ у, уымæ гæсгæ хъæуы оперативон æгъдауæй кусын. Министрадтæн æмæ ведомствотæн бабар кодтой лæмбынæг бакусын, иннæ аз цы объекттæ аразын райдайдзысты, уыдон бацæттæ кæныныл. Ныридæгæн федералон центримæ бафыстой æмгуыстады бадзырдтæ, æмæ хъæуы подрядчикты сбæрæг кæнын. Контракттæ бафыссыны фæстæ ахсджиаг у æвæстиатæй практикон хаймæ рахизын. Подрядон организацитæ та хъуамæ афоныл алы арæзтадон фæзы дæр сæххæст кæной пълан. Уыимæ – хæрзхъæд, загъта Битарты Вячеслав. Уæлдай тынгдæр уый хауы ахуыргæнæндæттæм, цæмæй дзы сывæллæттæ ахуыр кæнын райдайой æмбæлгæ уавæрты 1-æм сентябры. Уыцы объекттæм хауынц хъæуккаг культурæйы хæдзæрттæ дæр. Подрядон организациты архайдмæ та хъуамæ цæуа бындурон цæстдард.
