2021-æм азы Уæллаг Зджыды нысан кæнынц ирхæфсæн фæз аразын райдайын
Алы хуызы туризмы рæзты фарстатыл æрныхас кодтой Проектон офисы радон æмбырды. 2021-æм азы Уæллаг Зджыды нысан кæнынц ирхæфсæн фæз аразын райдайын. Куыстытæм бавналдзысты сæрды. Битарты Вячеслав профилон комитеты специалисттæн æмæ Алагиры районы разамындæн бабар кодта, проект царды рауадзынæн баххуыс кæнын, стæй фæндаггон картæйы цыдмæ цæст дарын. Бæлвырддæр – Фидараты Маринæ.
Туризмы рæзт нымад æрцыд Цæгат Ирыстоны социалон-экономикон къабазы фыццаградон хъуыддæгтæй иу. Уæвæг та ныртæккæ нæ республикæ проекттæ аразы алы къабæзты. Туристтæ се ргом фылдæр здахынц рекреацион зонæтæм æмæ туристон хъæутæм. Проектон офисы радон æмбырды ныхас цыд – Уæллаг Зджыды активон фæллад уадзынæн ирхæфсæн фæз саразыныл. 2021-æм азы ам нысан кæнынц проекты фыццаг къæпхæн аразын. Бакуыста йыл Хъарданты Олег. Уыдзæн дзы 7 коттеджы, хæрæндон æмæ фæлладуадзæн зонæ сывæллæттæн ирхæфсæн æмæ спортивон фæзтимæ.
Арæзтадмæ бавналын нысан кæнынц фидæны аз сæрды. Дыккаг къæпхæны та коттеджты нымæц фæфылдæр кæндзысты 12-ы онг. Æххæстæй та проект хъуамæ кæронмæ арæзт æрцæуа 3 азмæ. Битарты Вячеслав профилон комитеты специалисттæн æмæ Алагиры районы разамындæн бабар кодта, проект царды рауадзынæн баххуыс кæнын, стæй фæндаггон картæйы цыдмæ цæст дарын.
Битарты Вячеслав ма бабар кодта активон фæллад уадзынæн программæтыл бакусын, стæй маршруттæ сбæрæг кæнын. Уымæй дарддæр ма иннæ кæмтты ахæм проекттимæ æмгуыстад кæнын.
Республикæйы разамонæг куыд бафиппайдта, афтæмæй æвæстиатæй хъæуы кадрты фарстайыл дæр бакусын. Цæгат Ирыстоны туристон къабазы нæ фаг кæнынц алы профилы специалисттæ.
Туризмы комитет ныридæгæн кæны ацы куыст. Кадртæ агурынц курорт «Мамысон»-æн.
Проектон офисы æмбырды ма ныхас цыд альпинистон туризмы рæзтыл дæр. Бæлвырддæр та сног кæнын хъæуы Хъазыбеджы хохмæ балцытæ. Битарты Вячеслав бабар кодта проектыл бакусын, уым фыст æрцæудзысты æппæт лыстæг хъуыддæгтæ. Республикæ цæттæ у инфраструктурæйы фарстатæ йæхимæ райсынмæ, стæй ма инвестортæн гарантион æмæ микрофинансты фондтæй баххуыс кæнынмæ.
