Цымыдисаг экспозици саразыныл архайдтой куыд ахуыргæнджытæ, æфтæ ахуырдзаутæ дæр
Архивон æрмæджытæ, хæстон къамтæ, историон документтæ. Се ппæт дæр баст сты, Ирыстонæй фронтмæ чи ацыди, уыцы хæстонтимæ. Æппæт ацы æрмæг фенæн ис скъолаты музейты æмæ æфсæддон намысы къуымты. Уыдонæй 10 нымад æрцыдысты хуыздæртыл республикон конкурсы. Сарæзтой йæ Стыр Уæлахизы 75 азы юбилеймæ. Цымыдисаг экспозици саразыныл архайдтой куыд ахуыргæнджытæ, æфтæ ахуырдзаутæ дæр. Дзæуджыхъæуы 46-æм скъолайы цы куыст бакодтой, уый тыххæй радзурдзæн Томайты Батраз.
Хуыздæрты æмрæнхъ æрлæууын. Цæгат Ирыстоны скъолаты 10 музейы æмæ æфсæддон намысы къуымы нымад æрцыдысты хуыздæртыл сæрмагонд республикон конкурсы. Баст уыд Стыр Уæлахизы 75 азы бонимæ. Конкурсæн хатдзæгтæ скодтой сывæллæтты сфæлдыстады республикон галуаны.
«Иумæйагахуырадон организацийы хæстон намысы музейы» номинацийы дыккаг бынат бацахста Дзæуджыхъæуы, Дзусаты Ибрагимы номыл 46-æм скъола. Уæвгæ, ам æфсæддон-бæстæзонæн музей саразыны хъæппæрис рагæй фæзынди. Суанг скъолайæн Советон Цæдисы хъæбатыр Дзусаты Ибрагимы ном куы радтой, уæд. Æмæ сын бантыст.
Экспозици саразыны ахуыргæнджытимæ иумæ архайдтой ахуырдзаутæ дæр. Уыдон æмбырд кодтой архивон æрмæджытæ, къамтæ. Уымæй дарддæр сæмбырд кодтой, Ирыстонæй фронтмæ чи ацыд, уыдоны номхыгъд. Ныртæккæ каникулты рæстæг лæппутæ æмæ чызджытæ дарддæр архайынц виртуалон музей саразыныл, æмæ йæм æрмæг бацæттæ кæныныл.
Иуæй-иу экспонаттæ музейæн балæвар кодтой агурæн къордты уæнгтæ. Уæлдай æргом аздæхтой Дзусаты Ибрагимы хи дзаумæттæм. Уымæн æмæ скъола хæссы ныфсхаст хъæбатыры ном.
Хицæн стендтæ та баст сты, ныртæккæ цы æфсæддон быцæутæ цæуынц, уыдонимæ. Уым дæр Ирыстоны фырттæ сæхи равдыстой хъæбатыртæй. Сæ кой сын ракæнынц, музейы рæстæгæй-рæстæгмæ цы лæгдзинады уроктæ арæзт фæцæуынц, уым. Сæйраг нысан у – цæмæй рæзгæ фæлтæр сæ зæрдыл дарой сæ кадджын æмзæххонты сгуыхтдзинæдтæ.
