Программæ «Æрыгон профессионалтæ» æххæст кæнгæйæ, æгуыст адæмæн сæ бон у ног дæсныйæдтæ базонын
700 адæймаджы онг баззадысты æнæ куысты бынатæй, кæнæ та хæстæгдæр рæстæг уыдзысты æгуыстыл нымад. Йæ аххосаг – коронавирусы инфекциимæ баст мадзæлттæ. Программæ «Æрыгон профессионалтæ» æххæст кæнгæйæ, æгуыст адæмæн сæ бон у ног дæсныйæдтæ базонын. Ныртæккæ сæ профессионалон ахуыргæнæндæтты цæттæ кæнынц 50 компетенцимæ гæсгæ. Иуæй-иу дæсныйæдтыл сахуыр кæнæн ис дардмæ. Куыд, уый тыххæй бæстондæр радзурдзæн Бокоты Виктория.
Раздæр Елена Апостолиди куыста букмекерон комапнийы, фæлæ пандемия бахаста йæхи ивддзинæдтæ, æмæ Еленæ баззади æнæ куыстæй. Райдыдта ног бынат агурын. Æрыгон чызджы рагæй фæндыди салоны кусын. Программæ «WorldSkills Express»-ы фæрцы Еленæ ныр ис ног дæсныйады.
Ахуырæн аккредитаци райсынæй дарддæр ма ацы центр райста иннæ модультæм гæсгæ дæр. Курсытæ ацæуыны фадат ис, коронавирусы пандемияйы аххосæй æгуыстæй чи баззад, уыцы адæмæн. Уыдонмæ хауынц 2020-æм азы рауагъдонтæ дæр.
Ацы программæ йæ фæлтæрддзинад фæфылдæр кæнынæн фадат радта Плиты Ренатæн дæр. Ивгъуыд аз каст фæци арæзтадон техникум, фæлæ йæ дæсныйадмæ гæсгæ куыст не ссардта. Ныртæккæ ахуыр кæны профессионалон цæттæдзинады республикон центры. Йæ дæсныйадыл æфтауы агуыридурæй амайыны хъуыддаджы.
Ныртæккæ цæуы программæ «WorldSkills Express»-ы фыццаг къæпхæн. Архайынц дзы, куыстагур чи у, стæй йæхи ног дæсныйады бафæлварынмæ чи хъавы, ахæм адæм. Дæсныйæдты хыгъды ис цыппоры бæрц. Равзарæн сæ ис сайт ЦОП15 .ру.-йы. Программæ кусы Уæрæсейы Рухстауæн, фæллойы æмæ социалон рæзты Министрадты, стæй фæлхасадмæ цæстдарды Управленийы æххуысæй.
