Мæздæджы районы разамынды ргом аздæхтой 5-æм æмæ 8-æм скъолаты хъæндзинæдтæм
Æппæтуæрæсеон адæмон фронты цæгатирыстойнаг хайады уæнгтæ Мæздæджы районы разамынды ргом аздæхтой 5-æм æмæ 8-æм скъолаты хъæндзинæдтæм. Уый фæдыл æхсæнадон архайджытæ сарæзтой радон мониторинг Мæздæджы. Федтой, скъолаы тæвд хæринаг дæтты хъуыддаг цавæр æмвæзадыл ис, уый. Адæмон фронты уæнгтæ бабæрæг кодтой 3 бынæттон скъолайы. Федтой хæрæндæттæ, сæ кусæнгæрзтæ, хойрæгты хæрзхъæддзинад æмæ æндæр ахсджиаг хъуыддæгтæ. 8-æм скъолайы уазджытæ се ргом аздæхтой уымæ, æмæ хæринаджы тæф кæны суанг бæстыхаймæ бацæуæны. Уый та дзурæг у ууыл, æмæ вентиляцион системæ, куды æмбæлы, афтæ нæ кусы. 5-æм скъолайы æхсæнадон кусджытæ бафиппайдтой, хæринаггæнæн блок кæй у уæрæхгæнинаг, стæй ма цух æййафынц сæрмагонд кусæнгæрзтæй. Рейды рæстæг ма Æппæтуæрæсеон адæмон фронты минæвæрттæ æркастысты хойрæгты хæрзхъæддзинадмæ, куыд æмæ сæ кæм дарынц, уымæ, стæй æдасдзинады домæнтæ куыд æххæстгонд цæуынц, уымæ. Зæгъын ма хъæуы уый дæр, æмæ æппæты хуыздæр уавæр разынд Мæздæджы 108-æм скъолайы.