Бæлвырд дзырдтой, дины минæвæртты хсæн хæлар ахастдзинæдтæ фидар кæныны фарстатыл
Битарты Вячеслав фембæлд пысылмæтты управленийы разамонæг Гуæцæлты Хадзымуратимæ. Бæлвырд дзырдтой, дины минæвæртты хсæн хæлар ахастдзинæдтæ фидар кæныны фарстатыл. Республикæйы разамонæг куыд бафиппайдта, афтæмæй управлени уыцы къабазы æвдисы ахадгæ куыст. Йæ фæрцы аразынц рухстауæн мадзæлттæ, хæрзаудæн акцитæ. Уыимæ бафиппайын хъæуы уый дæр, æмæ управлени æххуыс кæны æрмæст пысылмæттæн нæ, фæлæ фæкæсынхъуаг чи у, уыцы адæмæн се ппæтæн дæр. Гуæцæлты Хадзымурат радзырдта организацийы ивгъуыд азы куысты бæрæггæнæнты тыххæй. Кæд коронавирусы пандемия бирæ цæлхдуртæ сæ размæ æрæвæрдта, уæддæр сæ нысанты фылдæр хай æххæстгонд æрцыдис. Ныртæккæ пысылмæтты управлени цæттæ кæны ног разамонæджы æвзæрстытæм. 17-æм мартъийы равзардзысты, республикæйы муфтий хæстæгдæр фондз азы чи уыдзæнис, уый.
