Бакуыста йыл нациты хсæн ахастдзинæдты фарстаты фæдыл министрад
Цæгат Ирыстоны паддзахадон университеты фæсарæйнаг студенттæн арæзт æрцыд экскурси. Бакуыста йыл нациты хсæн ахастдзинæдты фарстаты фæдыл министрад. Ахæм балцы нысан уыд – фæсарæйнаг фæсивæды ирон æгъдæуттæ æмæ традицитимæ базонгæ кæнын. Уымæй дарддæр ма ахæм мадзæлты фæрцы цæуы иннæ ахсджиаг куыст дæр – экстремизмы ныхмæ тох. Лæппутæ æмæ чызджытæ бабæрæг кодтой Барбашовы фæз, Гæздæнты 7 æфсымæры цыртдзæвæн стæй æндæр зæрдылдарæн бынæттæ. Касаты Наирæ радзурдзæн бæстондæр.
Хетæджы къох цы у, уый Эммануэл Кодуах нырма ныр базыдта. ЦИПУ-йы историон факультеты аспирант у Ганæйæ. Кавказаг традицитæ æмæ æгъдæуттæ йын сты стыр энциклопедиау, алы хатт дæр йæхицæн базоны исты ногдзинад.
Æртæ чъирийы æмæ Лæгты Дзуармæ скуывд. Сæ хистæр Дзугкойты Хасаны цур сты ныр æндæр бæстæтæй хæлæрттæ. Не сфæлдисæгæй курынц Ирыстоны адæмæн хорздзинад.
Эрика Акоста та у Эквадоры минæвар. Ахуыр кæны медицинон факультеты 1-æм курсы. Йæ ахуыргæнджытæ дзы куыд зæгъынц, афтæмæй у куыстуарзаг æмæ зонындзинæдæм чи тырны, ахæм. Бæлццæтты бардуаг, Ныхасы лæгты Дзуары цыртдзæвæны цур ис фыццаг хатт.
Барбашовы фæз, Гæздæнты æфсымæрты цыртдзæвæн, Рекомы кувæндон. Ирыстоныл экскурситæ фæсарæйнаг студенттæн фыццаг аз нæ аразынц. Сæ нысан – адæмыхæттыты хæлардзинад, цæмæй кæрæдзийæн барой, æмæ кæной фæлмæнзæрдæ.
Цæгат Ирыстоны зæрдылдарæн бынæттыл экскурси тагъд рæстæджы скæндзысты Цæгат Ирыстоны паддзахадон медицинон академийы æмæ хæххон металлургон институты студенттæн дæр.
