Республикæйы разамонæджы ныхæстæм гæсгæ, ацы системæ Цæгат Ирыстонæн у ног практикæ, фæлæ хъæугæ
Нæ республикæйы къазнайы куыстыл Сергей Меняйло аныхас кодта Уæрæсейы Федералон къазнайы разамонæг Александр Демидовимæ. Республикæйы разамонæджы ныхæстæм гæсгæ, ацы системæ Цæгат Ирыстонæн у ног практикæ, фæлæ хъæугæ. Уый фадат ратдзæн паддзахадон контрактты хæрдзтæм бæстондæр цæстдарынæн. Уый та фæбæрæг уыдзæн бюджетон фæрæзтæй ахадгæ пайда кæныныл. Александр Демидов дзырдта ууыл дæр, æмæ федералон службæ цæттæ кæй у алывæрсыг æххуыс кæнынмæ. Афтæ, зæгъæм, нысан кæнынц республикон къазнайы кусджытæн ахуырадон мадзæлттæ аразын. Уымæй дарддæр паддзахадон заказгæнджытимæ æмæ подрядон организацитимæ фембæлдтытæ кæнын. Хæстæгдæр рæстæг уый фæдыл бафысдзысты æмгуыстады бадзырд.
