Дыккаг къуыри абитуриенттæ сæ курдиæттæ рвитынц куыд гæххæттын, афтæ электрон хуызы
Цæгат Ирыстоны уæлдæр æмæ астæуккаг ахуыргæнæндæтты кусын райдыдтой гæххæттытæ исæн къамистæ. Дыккаг къуыри абитуриенттæ сæ курдиæттæ рвитынц куыд гæххæттын, афтæ электрон хуызы. Алцыдæр конд цæуы фæлхасадмæ цæстдарды управленийы домæнтæ хынцгæйæ. Раздæрау фæсивæд фылдæр æвзарынц юридикон, экономикон, медицинон æмæ арæзтадон дæсныйæдтæ. Гæххæттытæ исæн къамистæ куыд кусынц, уый тыххæй бæстондæр радзурдзæн Фидараты Маринæ.
Алы бон дæр Цæгат Ирыстоны паддзахадон университеты гæххæтытæ исæн къамисы колл-центрмæ æрбацæуы сæдæ дзæнгæрæджы онг. Абитуриентты базонын фæнды уæлдæр ахуыргæнæндоны куысты фæтк, консультаци куыд райсæн ис, стæй хи кабинеты бæрæггæнæнтæ куыд аивæн ис, уый тыххæй. Дистанцион функцитæ та куыд æдасдзинады ног мадзæлттæ. Нырæй фæстæмæ гæххæтытæ арвитæн ис электрон хуызы, уый размæ та дæ къам чырæ телефонмæ сисгæйæ, æмæ ма иумæйаг паддзахадон фæлварæны баллтæ фæнысан кæнгæйæ. Уæвгæ та консультаци райсæн ис университетмæ бацæугæйæ дæр, æрмæст дæхи рагагъоммæ ныффысгæйæ.
Гæххæттытæ исæн кампани райдыдта 19-æм июны. Дыууæ къуыримæ райстой сæдæ курдиаты онг. Сæ фылдæр хай – дистанцион хуызы. Зæгъдзыстæм ма уый дæр, æмæ гæххæтытæ бадæттæн ис паддзахадон лæггæдты порталы уылты. Сæйрагдæр у – æппæт бæрæггæнæнтæ дæр раст бафыссын. Уый фæстæ абитурентимæ аныхас кæны къамисæй специалист. Уæлдæр кæнæ астæуккаг ахуыргæнæдонмæ бацæуынæн ма ис æндæр хуызтæ дæр. Суанг ма абитуриентæн йæ бон у йæ гæххæтытæ почтæйы уылты арвитын. Консультаци райсын та телефонæй. Битарты Гамлеты базонын фæндыд æппæт информаци. Уыимæ традицион хуызы. Йæ фидæны дæсныйад сбæлвырд кодта, скъолайы ма куы ахуыр кодта, уæд.
Раздæрау, æппæтæй парахатдæр дæсныйæдтыл нымад сты – юридикон, экономикон, медицинон æмæ арæзтадон. Стыр ерыс цæуы сфæлдыстадон факультетты. Цæгат Ирыстоны паддзахадон университеты ныртæккæ абитуриентты исынц аивæдты факультеты актеры дæсныйадмæ. Сæрмагонд курс 10 студентæй арæзт цæуы Ирон академион театрæн. Ахуырæн бафиддзæн дыууæ хатты олимпаг чемпион, политик, æхсæнадон архайæг Хæдарцаты Махарбег. 4 азы ахуыры аргъ у 7 милуаны æмæ 360 мин сомы.
Гæххæтыттæ исæн кампани цæуы медицинон колледжы дæр. Ис дзы 390 бюджетон бынаты, 5 дæсныйадмæ гæсгæ. Фармацевттæ, акушертæ, медицинон лаборанттæ.
5 азы размæ Дзапарты Артур уыд абитуриент. Уый равзæрста хæххон металлургон институт, æмæ сфæнд кодта архитектор суæвын. Абон та хъахъхъæны дипломон проект. Куыд зæгъы, афтæмæй арæзтады къабазы мадзæлттæ кæнынц нырыккондæр, уымæ гæсгæ специалист хъуамæ зона алцыдæр. Ома йæ куысты нырыккон технологитæй пайда кæнын.
Архитектурон-арæзтадон факультеты декан куыд зæгъы, афтæмæй ацы дæсныйад уарзон у абитуриентты хсæн. Педагогтæ архайынц студентты ахуырадон процесс алывæрсыгдæр кæныныл. Активонæй архайынц, социалон нысаниуæг кæмæн ис, ахæм объектты арæзтады. Зæгъæм, се вæрæн бахастой Дзæуджыхъæуы космонавтикæйы скъолайы, стæй Æрыдоны спортивон комплексы арæзтадмæ.
Ныртæккæ æппæт уæлдæр ахуыргæнæндæтты дæр гæххæттытæ исынц аспирантурæмæ, интернатурæмæ æмæ магистратурæмæ. Уыцы куыст цæудзæн 17-æм августмæ. Уый фæстæ та райдайдзысты фæлварæнтæ. Гæххæттытæ исæн къамис кусдзæн, цалынмæ æппæт ахуыргæнæндæтты дæр фыццæгæмкурсонты хыгъд æххæстæй нæ сфидар кæной, уæдмæ.
