Рацарæзты программæмæ хаст æрцыдысты, студенттæ кæм цæрынц, уыцы агъуыстытæ
Республикæйы физикон-математикон лицей-интернаты бæстыхæйттæ цæуынц бындурон цалцæг. Рацарæзты программæмæ хаст æрцыдысты, студенттæ кæм цæрынц, уыцы агъуыстытæ. Æмдзæрæны æмæ хæрæндоны бынæттæ хъуамæ фæзына зынгæ фылдæр. Куыстытæ цæуынц 355 квадратон метры. Нысан дзы кæнынц цалдæр блокы саразын. Бæлвырддæр радзурдзæн Гæджиты Сослан.
Республикæйы физикон математикон лицейы бындурон цалцæджы фæстæ бынæттæ фæзындзæни дыууæ хатты фылдæр. Уымæ рагæй бæллыдысты. Уый тыххæй æмæ лицейы ахуыргæнинæгтæй бирæтæ сты Цæгат Ирыстоны дæрддзæф хъæутæй. Ног ахуыры азы лицейы суткæйы дæргъы уыдзысты 60 ахуыргæнинаджы.
Подрядон организаци цалцæггæнæн куыстытæм бавнæлдта сæрды райдиан. Фæрæзтæ сты республикæйы бюджетæй. Куыстыты ахадгæ хай конд фесты. Ныртæккæ аразджытæ архайынц мидæгæй. Бæстыхæйттæм бауагътой æппæт коммуникацитæ, хъæуы ма дзы дондзæуæн системæ снывыл кæнын. Æмдзæрæны бынæттæ фæфылдæр кæныны фадат фæци, ацы аз ахуыргæнæндонмæ 1-æм къласмæ кæй нæ истой, уый тыххæй. Ног системæмæ гæсгæ лицеймæ исдзысты æрмæсдæр 5-æм къласмæ. Физикон-математикон лицейы бындуронæй цалцæг кæнынц хæрæндон дæр. Уый сног кæнын рагæй хъуыди. Ныртæккæ дзы ис 150 бынаты. Арæзтадон куыстытæм æрвылбон сæ цæст дарынц бындурон арæзтады техникон цæстдарды специалисттæ. Процессмæ кæсы лицейы администраци дæр. Æрвылкъуырион мониторинджы фæлгæты лицей бабæрæг кæны республикæйы хицауады сæрдары хæстæ æххæстгæнæг Тускъаты Таймураз дæр.
