Йемæ ма уыдысты хицауады сæрдары хæдивæг Тугъанаты Ларисæ æмæ культурæйы министры хæстæ рæстæгмæ æххæстгæнæг Къубалты Эльбрус
Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло кусæг балцы рæстæг бабæрæг кодта бæхты паддзахадон театр «Нартæ». Йемæ ма уыдысты хицауады сæрдары хæдивæг Тугъанаты Ларисæ æмæ культурæйы министры хæстæ рæстæгмæ æххæстгæнæг Къубалты Эльбрус. Республикæйы разамонæг федта театры территори æмæ аныхас кодта йæ разамонæгимæ. Театр «Нартæ» фæзынд 1990-æм азы. У, абæрæн кæмæн нæй, ахæм кудьтурон объект. Уымæн æмæ иу кæны драмæ, цирк, хорегографи æмæ спортивон аивад. Зæгъдзыстæм ма уый дæр, æмæ Уæрæсейы у иунæг бæхты театр. Труппæйы ис 20 артисты æмæ 11 бæхы. Йæ директор Сихъоты Тимур куыд радзырдта, афтæмæй фарон театрæн балхæдтой æмæ сæвæрдтой ног хъарм ангар – манеж. Уый фадат радта артисттæн репетицитæ афæдзы алы афон дæр кæнынæн. Театры бæрны ма ис иу манеж – гом арвы бын. Фæлæ сæм лыггæнинаг фарстатæ дæр ис, æмæ сæ æнæ республикæйы разамынды æххуысæй алыг кæнæн нæй. Бæлвырддæр та афтæ – театры нæй административон бæстыхай, стæй ма хъæуы территори фæуæрæхдæр кæнын æмæ йæ саив кæнын. Уыцы бон ма Сергей Меняйло базонгæ кафты Паддзахадон академион ансамбль «Алан»-ы куысты уавæртимæ. Йæ аивадон разамонæг Козаты Зелимханимæ ныхас кæнгæйæ, бабар кодта цыбыр æмгъуыдмæ фыццаградон фарстаты хыгъд бацæттæ кæнын. Ансамбль «Алан»-æн бындур æвæрд æрцыд 1938-æм азы. Коллектив гастрольты уыди дунейы дæсгай бæстæты. У фондз континенты æппæтадæмон фестивалы сызгъæрин майданы хицау. Уымæй дарддæр Къостайы премийы лауреат, æппæтуæрæсеон æмæ æппæтадæмон конкурсты уæлахиздзау. Ныртæккæ сфæлдыстадон къорды ис 80 адæймаджы. «Алан»-ы репертуар хъæздыг у 16 сфæлдыстадон номырæй. Фæлæ программæ нысан кæнынц фæуæрæхдæр кæнын. Æркæсинаг ма у – ныллæг куысты мызды фарста, ног транспорт æмæ репетцион бæстыхайы цалцæг.
