Бабæрæг дзы кодта, Беслæны комплексон рæзты генералон пъланы фæлгæты цы объекттæ арæзт цæуынц
Республикæйы сæргълæууæджы хæстæ æххæстгæнæг Сергей Меняйло кусæг балцы уыди Рахизфарсы районы. Бабæрæг дзы кодта, Беслæны комплексон рæзты генералон пъланы фæлгæты цы объекттæ арæзт цæуынц, уыдон. 2025-æм азмæ нысан кæнынц тагъд æххуысы медицинон станцæйы, аивæдты æмæ музыкалон скъолайы, æвзонг натуралистты станцæйы, горæты поликлиникæйы, сфæлдыстадон объектты арæзтад, стæй стадион «Пищевик»-ы рацарæзт. Горæты арæзтады сæйраг документы фыст ис парчы, фæндæгты æмæ цæрæнуæтты-коммуналон хæдзарады рацарæзт дæр. Сергей Меняйло фыццаг федта æвзонг техникты æмæ натуралистты станцæты арæзтадон фæзтæ. Ам фесты арæзтадон – монтажон куыстытæ, хъæуы ма дзы мидæгæй лыстæг куыстытæ æмæ сæ территоримæ базилын. Республикæйы разамонæг аразджыты æргом аздæхта, цæмæй сæ фыццаградон нысан уа куыстыты хæрзхъæддзинад. Уымæй уæлдай Сергей Меняйло загъта микрорайоны цæрæн комплексы арæзтады тыххæй. Профилон ведомствæйæн бахæс кодта проект бацæттæ кæнын. Специалисттæ куыд бафиппайдтой, афтæмæй микрорайоны нæй скъола. Бæрнон кусджытæ уыдысты, 120 бынатæн цы рæвдауæндон аразынц, уым дæр. Ацы фæззæгмæ уый дæр хъуамæ сцæтттæ уа. Сергей Меняйло подрядон организацийæн скодта къорд фиппаинаджы, æмæ бадомдта, цæмæй сыл хæстæгдæр рæстæг бакусой. Радон объект – профилактикæ æмæ терроризмы ныхмæ æппæтадæмон культурон-патриотон Центры арæзтадон фæз. Сергей Меняйло радта бæлвырд хæс: 2004-æм азы фæстиуджыты фæд бахъахъхъæнын. Йæ ныхæстæм гæсгæ, иннæ азмæ центр хъуамæ уа цæттæ.
