Дзырдтой дзы, республикæйы цы объекттæ ис, уыдон тероризмы фæзындтытæй куыд хъахъхъæд сты, стæй кусджытæ тæссаг уавæрты архайынмæ куыд цæттæ сты, уыдæттыл
Цæгат Ирыстоны ацыд тероризмы ныхмæ къамиы радон æмбырд. Дзырдтой дзы, республикæйы цы объекттæ ис, уыдон тероризмы фæзындтытæй куыд хъахъхъæд сты, стæй кусджытæ тæссаг уавæрты архайынмæ куыд цæттæ сты, уыдæттыл. Фылдæр æргом аздæхтой æххæстгæнæг оргæнты æмæ бынæттон хиуынаффæйады къабазы кусджыты профессионалон æмвæзад фæфылдæр кæныны фарстатæм. Ахуырады æмæ наукæйы министры хæстæ рæстæгмæ æххæстгæнæг Алыбегты Эллæ куыд радзыдта, афтæмæй æрмæст ацы азы райдианæй сарæзтой 254 иумæйаг хъомыладон æмæ амонæн мадзалы терроризмы фæзындтыты профилактикæйæн. Архайдтой дзы 38 мин ахуырдзауы æмæ студенты. Ведомствæ архайы, цæмæй экстремизм æмæ тероризмы профилактикæйы къабазы специалисттæ фылдæр бацæттæ кæной, ууыл. Республикæйы разамонæг Сергей Меняйло куыд загъта, афтæмæй скъолаты фылдæр æргом здахын хъæуы фыццаг фæзындтытæ рабæрæг кæнынмæ. Уый тыххæй та ахуырады райрæзты программæмæ хъæуы бахæссын психологты. Сергей Меняйло куыд загъта, афтæмæй кæд уыцы къабазы ахадгæ куыст цæуы, уæддæр уавæр у зæрдæхсаинаг. Æмбырды дзыртой, энергетикон комплекстæ, донæфсадæн æмæ дондзæуæн системæйы объекттæ террористон фæзындтытæй куыд хъахъхъæд цæуынц, ууыл дæр.
