Ахæм амынддзинæдтæ Сергей Меняйло радта Аппаратон æмбырды
Цæгат Ирыстоны паддзахадон медицинон академийы студенттæ сæ цæст дардзысты, сæхи ковидæй амбулаторон уагæй чи дзæбæх кæны, уыцы рынчынтæм. Ахæм амынддзинæдтæ Сергей Меняйло радта Аппаратон æмбырды. Студенттæй арæзт æрцæудзысты сæрмагонд къордтæ, цæмæй æххуыс кæной участоктыл кусæг дохтыртæн. Фæсивæд телефонæй дзурдзысты рынчынтæм, æмæ сæ бæрæг кæндзысты сæ хæдзæртты. Æмбырды ма æнæниздзинадхъахъхъæнынады министры хæстæ æххæстгæнæг Тебиаты Сослан куыд загъта, афтæмæй фæстаг суткæмæ ковид-стационартæм æххуысагур къаддæр адæм бацыд. Ацы къуыри Цæгат Ирыстонмæ хъуамæ баласой туаггуыры 100 концентраторы. Фæлхасадмæ цæстдарды управленийæ фехъусын кодтой, къуыримæ æрлæууын кодтой 7 организацийы архайд. Уыдон не ххæст кодтой низы ныхмæ домæнтæ. Сергей Меняйло ма загъта, ацы фарстамæ хъуамæ се ргом кæй раздахой депутаттæ. Регионы разамонæджы хъуыдымæ гæсгæ муниципалитетты сæргълæуджытæ хъуамæ активонæйдæр кæной æмбарынгæнæн куыст бынæттон цæрджытимæ.
2022-æм азы 1-æм январæй фæстæмæ республикæйы сæргълæууæджы номæй педагогон кусджыты æппæт категоритæн снысан кæндзысты фиддонтæ. Сергей Меняйло ахуырады министрадæн бабар кодта фарстамæ æркæсын, куысты мызды ног системæ аразгæйæ. Регионы сæргълæууæг ма йе ххуысгæнæгæй снысан кодта Гæззаты Юрийы. Уый кæсдзæн дзыллон футболы рæзты фарстатæм. Алы скъолайы дæр Сергей Меняйлойы амындмæ гæсгæ хъæуы иугонд футболон командæ скæнын. Афтæмæй уалдзæджы саразæн уыдзæн ерыстæ, республикæйы сæргълæууæджы приз рамбулыны тыххæй.
