Ахæм закъоны проект йæ дыккаг бакасты сфидар кодта Парламент
Республикæйы Конституцион тæрхондон 1-æм январы бауромдзæн йæ куыст. Ахæм закъоны проект йæ дыккаг бакасты сфидар кодта Парламент. Цæгат Ирыстоны хицаудзинады оргæнты системæ æркæндзæн федералон нормæйы æмвæзадмæ. Афтæ, 2023-æм азы онг бæстæйы конституцион тæрхондæттæ хъуамæ мауал уа. Уыдоны бæсты субъекттæн сæ бон у Конституцион советтæ саразын. Парламенты ма сфидар кодтой социалон къабазы, экономикон рæзты æмæ цæрджыты юридикон хъахъхъæнынады тыххæй хицæн хъæппæристæ. Республикæйы тагъд фæзындзæн лæвар лæггæдтимæ юридикон бюро. Уымæй уæлдай, Парламенты уæнгтæ сразы сты, Хицауадæн уæлæмхасæн бартæ чи дæтты, ахæм закъонимæ. Ныр, хи иппæрды фæткы рæстæг, æххæстгæнæг хицаудзинады оргæнтæн сæ бон у, ковиды ныхмæ домæнтæ чи не ххæст кæны, уыдоны ивар кæнын. Закъоныл цыди карз ныхас. Йæ авторты хъуыдымæ гæсгæ, закъонæй пайда кæндзысты, пандемийæйы уавæр кæд мыййаг фæкарздæр уа, уæд.
