Уый фæдыл кадджын мадзал арæзт æрцыд Дзæуджыхъæуы 44-æм скъолайы
Цæгат Ирыстоны райдыдта педагогон дæсныйады конкурс «Учитель года – 2022»-ы муниципалон къæпхæн. Уый фæдыл кадджын мадзал арæзт æрцыд Дзæуджыхъæуы 44-æм скъолайы. Æрбахуыдтой йæм конкурсантты, жюрийы уæнгты, республикæйы ахуырады æхсæнады минæвæртты. Мадзал байгом кодтой Цæгат Ирыстоны ахуырады æмæ наукæйы министр Алыбекты Эллæ стæй Дзæуджыхъæуы бынæттон администрацийы сæргълæууæджы хæдивæг Ходы Мæдинæ. Ацы аз конкурсы архайынц 44 педагогы математикæйæ, химийæ, физикæйæ, историйæ, уырыссаг æвзагæй, физкультурæйæ, æхсæнадзонынадæй æмæ æндæр предметтæй.
Традицимæ гæсгæ, конкурс цæуы дыууæ къæпхæнæй. 10 боны дæргъы архайджытæ цæудзысты конкурсы фæлварæнтæ æмæ дзы равдисдзысты сæ профессионалон æууæлтæ. Конкурсы девиз «Учить и учиться» ирдæй æвдисы нырыккон ахуырады сæйрагдæр хæстæ. Жюрийы хыгъды сты бынæттон администрацийы специалисттæ, профессионалон æхсæнады минæвæрттæ, конкурсы раздæры азты уæлахиздзаутæ, Уæрæсейы адæмон ахуырады æмæ наукæйы кусджытæ. Муниципалон къæпхæны уæлахиздзаутæ архайдзысты республикæйы æвзарæн къæпхæны. Финалист та Цæгат Ирыстоны кад хъахъхъæндзæн æппæтуæрæсеон конкурсы.
