Аппаратон æмбырды ма ныхас цыд коронавирусы уавæрыл дæр
Цæгат Ирыстоны цæттæ кæнынц Донецкы æмæ Луганскы Адæмон республикæтæй æрбалидзæг адæмы суазæг кæнынмæ. Уый тыххæй аппаратон æмбырды фехъусын кодта хицауады сæрдары хæдивæг Тугъанаты Ларисæ. Донбассы цæрджытæм нæ республикæйы æнхъæлмæ кæсынц дыууæ къæпхæнæй: 10-æм мартъийы æнхъæлмæ кæсынц 500 адæймагмæ, стæй ма уыйбæрц – июны. Хæстæгдæр рæстæг цæттæ кæнын райдайдзысты сæ цæрæн бынæттæ. Нысан сæ кæнынц санаторитæ «Тæмискъ», «Осетия», «Юность» æмæ «Фиагдон»-ы æрцæрын кæнын. Сæрды ма сæм бафтдзæн пансионат «Урсдон» дæр. Уымæй дарддæр Цæгат Ирыстоны арæзт æрцæудзæн оперативон штаб, сæрмагондæй æрбалидзæг адæмы фарстатæ лыг кæнынæн.
Аппаратон æмбырды ма ныхас цыд коронавирусы уавæрыл дæр. Куыд фæбæрæг кодтой, афтæмæй рынчынты нымæц кæны къаддæр. Ивгъуыд къуыриимæ абаргæйæ, коронавирусæй рынчынтæ фæкъаддæр сты 5 æмæ рдæг %. Рынчындæттæм та баластой 36% къаддæр адæмы. Нæ республикæмæ ссыди мæскуыйаг медикты бригад. Специалисттæ республикон æмкусджытæн кæндзысты методикон æмæ практикон æххуыс. Ныхас цыд æндæр темæтыл дæр. Премьер Дзанайты Барис фехъусын кодта, Дзæуджыхъæу кæй райсдзæн 45 ног трамвайы. Раздæр Цæгат Ирыстоны Сæргълæууæг Сергей Меняйло курдиат балæвæрдта Уæрæсейы хицауадмæ. Къостайы проспекты трамвайты рельсытæ ивынц, куысты фæткæй раздæр, – загъта Дзæуджыхъæуы администрацийы сæргълæууæг. Уымæй дарддæр ма Милдзыхты Вячеслав радзырдта, Уæрæсейы арæзтады министрадмæ æркæсынмæ кæй арвыстой 5 проекты. Баст сты горæты аивдзинадмæ. Хорзыл уал банымадтой дыууæ. Се хсæн доны станцæйы рацарæзт. Уыцы куыстытæн радих кæндзысты 1 миллиард æмæ 417 милуан сомы.
