Иннæ предметты хсæн æм уæлдай æргом здахынц Дзæуджыхъæуы 13-æм скъолайы
Мадæлон æвзагмæ æмæ ирон аив дзырдмæ цымыдисдзинад æвзæрын кæнынæн ахадгæ мадзал у – ирон æвзаг æмæ литературæйæ олимпиадæ. Иннæ предметты хсæн æм уæлдай æргом здахынц Дзæуджыхъæуы 13-æм скъолайы. Уым рæстæгæй-рæстæгмæ арæзт фæцæуынц алыхуызон зонадон ерыстæ. Ныртæккæ дæр нæ республикæйы цæуы ирон æвзаг æмæ литературæйы олимпиадæйы регионалон къæпхæн. Архайынц дзы 193 адæймаджы. Сты 9-11 кълæсты ахуырдзаутæ. Уыдон раздæр æнтыстджынæй ацыдысты ерысты муниципалон къæпхæн. Олимпиадæйы фæрстытыл бакуыста ахуырады кусджыты фæлтæрддзинад фылдæргæнæн институт. Олимпиадæйы призертæн фадат уыдзæн Цæгат Ирыстоны паддзахадон университеты ирон филологийы факультетмæ æнцондæрæй бацæуынæн.
