10 азæй фылдæр бынæттон цæрджытæ хъаст кодтой сæ уавæрæй
Куыстуат «Владсток» кæронмæ фæци Кутузовы уынджы уарындæтты канализацийы рацарæзт. 10 азæй фылдæр бынæттон цæрджытæ хъаст кодтой сæ уавæрæй. Уарынты рæстæг-иу уынгтæ донæй байдзаг сты. Цалцæггæнæн куыстытæ цыдысты цалдæр къæпхæнæй. Ныртæккæ та канализаци скуыста æппæт хъомысæй. Куыстыты радон къæпхæн райдыдта Марковы, Дзанайы-фырты, Æнæном салдаты æмæ æндæр уынгты. Бæлвырддæр хабæрттæ радзурдзæн Гуытъиаты Алинæ.
Къæвдайы дондзæуæнты коллекторты диаметр хаттæн иу метрæй дæр фæфылдæр вæййы. Фæлæ уæддæр уайтагъд бырæттæй айдзаг вæййынц — хæтæлты цы хауæддзæгтæ вæййы, уыдон сеппæт дон нæ аласы. Ватутины уынджы коллектор кæдæй кусы, уæдæй нырмæ дзы раластой фæндзай кубометры бырæттæ. Æмæ дзы цы нæ фендзынæ — дуртæ, къæцæлтæ, асфальты сæстытæ. Къухæй сын сисæн нæй æмæ кусджытæ пайда кæнынц техникæйæ. Фæлæ хаттæн хæтæлтæ зæххы бын кæй вæййынц, уый тыххæй сын асыгъдæг кæнæн нæ вæййы.
Кутузовы уынджы чысыл къæвда дæр цæугæдонмæ расайы.
Цомайты Зояйы зæрдæ сæрды коймæ бариссы. Йæ хæдзар ис Виноградныйы уынджы æмæ тæрккъæвдаты рæстæг доны бын фæвæййы. Уый тыххæй сылгоймаг йæ хæдзары дзаума цармæ схæссы.
Иу хатт та тыхджын къæвдайы фæстæ сылгоймаджы бон йæ хæдзарæй рацæуын не ссис. Хорз æмæ йæ цот фæфæдис сты, æмæ йæ доны уацарæй суæгъд кодтой.
Бирæтæ сæхи къæвдайæ машинæты бамбæхсынц. Фæлæ Дзæуджыхъæуккаг шофыртæ сæхиуыл нæ, фæлæ сæ транспортыл тынгдæр стыхсынц. Дон мидæмæ куы бахъара, уæд машинæ зæгъæн ис æмæ нал бæздзæн — зæгхы Гаджиты Сергей.
Фистæгæйцæуджытæ къæвдабон сæхи æрмæст тæрккъæвдайæ нæ хъахъхъæнынц, фæлæ ма фæндаджы цæугæдæтты агурынц, кæм нæ аныгъуылой, ахæм бынат ссарын.
Сæйраг куыстытæ кæронмæ æрхæццæ сты. Къæвдайы дондзæуæн канализацитæ бæлвырд сыгъдæггонд æрцыдысты. Уый фæрцы ныртæккæ Кутузовы уынджы канализаци кусы куыд æмбæлы, афтæ. Горæты иннæ уынгты уавæр куыд уыдзæнис, уый та фæстæдæр фендзыстæм.
