Уæлдайдæр та, афтектæ æмæ фельдшерон-акушерон пункттæ кæм нæй, ахæм дæрддзæф хъæуты
Сергей Меняйло бабар кодта хостæй ифтонгдзинадмæ бæстон цæст дарын. Уæлдайдæр та, афтектæ æмæ фельдшерон-акушерон пункттæ кæм нæй, ахæм дæрддзæф хъæуты. Ахæм объекттæ ныртæккæ сты 20 онг. Афтæ фехъусын кодта æрвылкъуырион аппаратон æмбырды æнæниздзинадхъахъхъæнынады министр Тебиаты Сослан. Регионы разамонæг стыр æргом аздæхта уымæ, æмæ ахæм хъæуты фылдæр ис ацæргæ адæм, æмæ сын хъуамæ æнæмæнг фадат уа æмбæлгæ хостæ райсынæн, – загъта Сергей Меняйло.
Уыимæ профилон ведомствойы бæрæггæнæнтæм гæсгæ, COVID-19-æй рынчынты нымæц Цæгат Ирыстоны цæуы къаддæргæнгæ. Афтæ ивгъуыд къуыримæ дзы фæрынчын 27% къаддæр, рынчындæтты та пациентты нымæц фæныллæгдæр 10 %. Дыууæ хатты фæкъаддæр сты пневмонийæ рынчынтæ дæр. Фæлхасадмæ цæстдарды республикон управленийы, раздæрау, курынц санитарон домæнтæ æххæст кæнын, уымæн æмæ эпидемиологон уавæр нырма у тæссаг.
