Ахæм уынаффæ рахаста Сергей Меняйло аппаратон æмбырды
6-æм маймæ нæ республикæйы æппæт рекламон баннертыл хъуамæ уой ветеранты портреттæ. Ахæм уынаффæ рахаста Сергей Меняйло аппаратон æмбырды. Ныридæгæн бирæ рæтты баззад коммерцион рекламæ, æмæ уый раст нæу, загъта республикæйы сæргълæууæг. Зын экономикон уавæр хынцгæйæ, регионы разамонæг экономикон рæзты Министрадæн бабар кодта рекламон агентадтæн æххуысы мадзæлттыл бакусын. Æрныхас ма кодтой, Украинæйы сæрмагонд операцийы чи фæмард, уыцы æфсæддонты бинонтæн баххуыс кæныны фарстатыл. Алы бинонтимæ дæр хъуамæ бакусой хицæнæй, бафиппайдта Сергей Меняйло. Хæстæгдæр рæстæг хъуамæ алкæйы тыххæй дæр бацæттæ кæной бæлвырд информаци. Уымæй дарддæр ахуырады æмæ наукæйы министр Алыбекты Эллæ фехъусын кодта, ныры онг нæ республикæйы кæй сбæлвырд кодтой арæзтадон отрядтæ. Ныртæккæ дзы ис 150 студенты. Сергей Меняйло арæзтады Министрадæн бабар кодта ахæм бригадтæ республикæйы объектты арæзтадон куыстытæм здахын.
