Ныртæккæ специалисттæ иртасынц базар «Викалинæ»-йы зынгсирвæзты аххосæгтæ
Дзанайты Барис æнæнхъæлæджы уавæрты æмæ мидхъуыддæгты министрадтæн, стæй прокуратурæйæн бабар кодта республикæйы базартæ сбæрæг кæнын, зынгсирвæзты ныхмæ мадзæлттæ дзы куыд æххæст кæнынц, уый базоныны тыххæй. Ныртæккæ специалисттæ иртасынц базар «Викалинæ»-йы зынгсирвæзты аххосæгтæ. Уый тыххæй аппаратон æмбырды фехъусын кодта Æнæнхъæлæджы уавæрты министрады цæгатирыстойнаг управленийы хицауы фыццаг хæдивæг Николай Иванов. Эксперттæ бынаты раиртæстой электрон тыхдæттæг телты хæйттæ. Цæстдарæн мадзæлттæ ацы базары цыдысты 2019-æм азы, зæгъынц æнæнхъæлæджы уавæрты министрады кусджытæ. Уæд цы аиппытæ сбæрæг кодтой, уыдонмæ гæсгæ административон æфхæрд баййæфта бæлвырд адæймаг. Аиппытæ та хъуамæ аиуварс кодтаид 2020-æм азмæ. Фæлæ уый фæстæ, пандемияйы аххосæй бæрæггæнæн куыст нал цыди.
Аппаратон æмбырды ма ныхас цыд æргъты æмвæзадыл дæр. Экономикон рæзты министр Кучиты Зауыр куыд радзырдта, афтæмæй уавæрмæ цæуы бæстон цæстдард. Уыимæ нæ регионы хойраджы продукттæ фæлхасгæнджытæ æлхæнынц, раздæр куыд æлхæдтой, афтæ. Товарты дефицит нæй. Ныхас ма цыд Цæгат Кавказы социалон-экономикон рæзты стратегийыл 2030-æм азмæ. Сæйраг хæстæ – скъолаты æмæ рæвдауæндæтты арæзтад, медицинон-санитарон æххуысы системæйы, цæрæнуæтты, агропромышленнон комплексы рæзт, промышленнон арæзтæдты модернизаци. Уымæй дарддæр транспортон инфраструктурæйы æмæ туризмы рæзт. Дзанайты Барис экономикæйы министрадæн бабар кодта дыууæ къуырийы мгъуыдмæ хъуыддаг сбæлвырд кæнын.
