Специалисттæ федтой зынгхуыссынгæнæн кусæнгæрзты æмæ электрон тыхдæттæг телты уавæр
Æнæнхъæлæджы уавæрты министрады кусджытæ сбæрæг кодтой лагерь «Звездочка»-йы цæттæдзинад дзæбæхгæнæн сезонмæ. Байгом кæнынмæ йæ хъавынц июны фыццаг бонты. Уый размæ та æнæмæнг фенын хъуыдыи, лагеры æдасдзинады домæнтæ куыд æххæстгонд æрцыдысты, уый. Специалисттæ федтой зынгхуыссынгæнæн кусæнгæрзты æмæ электрон тыхдæттæг телты уавæр. Хъайтмазты Дзерассæ радзурдзæн бæлвырддæр.
Æнæнхъæлæджы уавæрты министрады кусджыты æркаст райдыдта эвакуацийы пъланæй. Сывæллæтты лагеры æдасдзинады домæнтæ хъуамæ зæрдæхсаинаг ма уой.
Лагеры дзæбæхгæнæн сезон райдайдзæн 3-æм июны. Ныридæгæн кæронмæ фæхæццæ кæнынц цæттæгæнæн куыстытæ. Агъуыстытæ аив кæнынц. Æдасдзинады системæ кусы æнæ къуылымпытæй. Бæстыхайы ис цалдæр уæлæмхасæн рацæуæны, ис хъæугæ зынгхуыссæн фæрæзтæ дæр.Ацы аз лагеры уыдзæн 4 рады. Алкæцыйыдæр – 35 адæймаджы. Бацæттæ сын кодтой ахуырадон æмæ ирхæфсæн программæтæ.
Сæрмагонд æргом аздахдзысты ирон культурæ ахуыр кæнынмæ. Сывæллæттæн радзурдзысты традициты тыххæй, бацамондзысты ирон хæринæгтæ кæнын. Сараздзысты сын экскурситæ, дæсныйадæвдисæг ахуыртæ, хъæзтытæ. Лагеры ма ис спортивон фæзтæ, бассейн, кинонывтæм кæсынæн зонæ. Сæйрагдæр та – объекты æдасдзинады паспорт цæттæ у
Сывæллæттæ лагерьмæ куы æрбацæуой, уæд сын, фыццаджыдæр, сараздзысты инструктаж. Радзурдзысты сын, æнæнхъæлæджы уавæры рæстæг хи дарын куыд хъæуы, уый. Сæрмагонд ахуырты зынгхуыссынгæнджытæ равдисдзысты, ссудзынæй тæссаг кæмæн у, ахæм предметтимæ куыд архайын хъæуы, уый.
