Ерысты архайынц муницпалон скондты алы кары хуыздæр командæтæ
Спортивон скъола «Юность»-ы æмæ Æрыдоны стадионты цæуы æвзонг футболистты турнир «Сæрак пурти 2022»-йы республикон къæпхæн. Ерысты архайынц муницпалон скондты алы кары хуыздæр командæтæ. Раздæр уал æвзонг спортсментæ хъуамæ ацæуой къордты хæсн турнир. Уый фæстæ сбæрæг уыдзысты æрдæгфиналисттæ. Финал та уыдзæн райсом, 8-æм июны. Цæгат Ирыстоны хуыздæр командæтæ се спортивон цæттæдзинад равдисдзысты Æппæтуæрæсеон финалы. Бæлвырддæр хабæрттæ радзурдзæн нæ уацхæссæг Гæджиты Сослан.
Зын тактикон фæлтæрæнтыл дзурын нырма раджы у. Æвзонг фæсивæдон футбол – уый фыццаджыдæр дзурæг у хорз æнкъарæнтыл æмæ уæлахизмæ тырнындзинадыл. Уымæ гæсгæ тренер фылдæр æргом здахы спорты ацы хуызы бындуртæм. Иннæ хъуыддæгты та æххуыс сты, трибунæты чи бады, уыдон.
«Сæрак пурти» – у Уæрæсейы рагондæр фæсивæдон турниртæй иу. Ацы ерысты йæ рæстæджы раргом Олег Блохины, Валерий Карпины, Андрей Шевченкойы æмæ Дзæгъойты Аланы курдиат. Хоранты Алыбегмæ ацы аз фæзынд ног бæллиц. Бæлвырддæр та – нысан. Рамбулын турнир, стæй ма бацархайын йе мзæххон зындгонд футболист беслæйнаг Дзæгъойты Аланы хуызæн уæрæсейаг футболы историмæ бацæуын.
Турнир «сæрак пурти»-йы сæрмагонд домæн у, цæмæй дзы ма архайой, спортивон скъолатæм чи цæуы, ахæм фæсивæд. Фæлæ уый хыгъд ардыгæй бахауæн ис футболон академимæ. Фæсивæдон командæты тренертæ æркæсынц лæппутæм, æмæ дзы равзарынц, зæрдæргъæвддæр чи у, уыдоны.
Республикон къæпхæны архайынц, районты чи фæуæлахиз, уыцы къордтæ. Уыдон та сты æстгай командæтæ алы кары дæр. Æмтгæй райсгæйæ – 200 райдайгæ спортсмены. Æппæтуæрæсеон финалмæ рацæуыныл архайынц спортивон скъола «Юность»-ы æмæ æрыдойнаг стадионты.
Турнир «Сæрак пурти»-йы финалмæ рацæудзысты республикæйы 5 командæйы. СÆйраг къæпхæн уыдзæн июлы. Æппæтуæрæсеон къæпхæн та ацæудзысты горæттæ Волжскийы æмæ Ивановойы.
